सलमान खान २८ फागुन, भैरहवा । रुपन्देहीको भैरहवा नाकाबाट तेस्रो मुलुकका ४८ पर्यटकहरु बिनाभिसा नेपाल घुमेर फर्केको रहस्य खुलेको छ । भारत हुँदै नेपाल प्रवेश गरेका उनीहरु लुम्बिनीदेखि काठमाडौंसम्म घुमघाम गरी पुनः भारत फर्किन सफल भएका छन्, तर निकै हैरानीका साथ ।
नेपालको बेलहिया र भारतको सुनौलीमा रहेका अध्यागमन कार्यालयको मिलोमतोमा उनीहरुलाई छिराइएको आशंका गरिएको छ । नेपाल प्रवेश गरेकाहरुमा भियतनामी मुलका ४७ जना अमेरिकी र एक क्यानाडेली नागरिक छन् । अनलाइनखबरले ती लामो खोजीपश्चात अवैधरुपमा नेपाल पसेका विदेशीहरुको यात्रावृतान्त फेला पारेको छ ।
यी पर्यटकहरु आफ्नो देशबाट सिङ्गल इन्ट्री भिसामा भारत आएका थिए । सिङ्गल इन्ट्री भिसामा एक देशबाट अर्को देशमा आएको व्यक्ति तेस्रो देशमा गएर पुनः सोही देशमा फर्किन पाउँदैनन्।
उनीहरु फागुन १६ गते अर्थात फेब्रुअरी २८ तारिखमा भारतको दिल्ली र बनारसमा कार्यालय रहेको युनि टप टुर्स एन्ड ट्राभल्समार्फत युपी ६५ सिटी ४००० र युपी ६५ सिटी ४७२६ नम्बरका दुई बस चढी नेपालको सीमानासम्म आए । दुवै गाडीमा २४/२४ जना बसेका थिए । युनि टप टुर्स एन्ड ट्राभल्सका सन्तोष सिंह नामक कर्मचारी उनीहरुको गाइड रुपमा आएका थिए ।
युपी ६५ सीटी ४००० नम्बरको गाडी ३६३३९ नम्बरको प्रज्ञापनपत्र मार्फत ४ दिनका लागि भैरहवा भन्सार कार्यालयबाट पास गराइएको कार्यालयका निमित्त प्रमुख गोविन्द पौडेलले बताए । भन्सार कार्यालयको दर्ता किताबअनुसार उक्त गाडीका धनी शुभलेन्द्र कुमार रहेका छन् । अर्को युपी ६५ सिटी ४७२६ नम्बरको गाडी भने सोही दिन सिमानाबाटै भारत फर्काइयो । सो गाडीमा चढेका २४ जना नेपाली नम्बर प्लेटको अर्को गाडीमा बसेर गएको भैरहवा भन्सारबाट भारतीय गाडीहरु नेपाल प्रवेश गराउने एक एजेन्टले बताए । नेपाली गाडीको नम्बर खुलेको छैन । भन्सारमा गाडी पास गराउँदा बेलुकी ४ बजेको थियो ।
त्यसपछि उनीहरु पहिला लुम्बिनी पुगे । २८ फेब्रुअरी अर्थात फागुन १६ गते ४८ जनाको भियतनामी टोली साँझ पख कार्यालय बन्द हुन समयमा आएको लुम्बिनी विकास कोषका सुचना संयोजक राजन बस्नेतले बताए । सुचना केन्द्रको पर्यटक आगमन किताबमा उनीहरुलाई भियतनामी पर्यटक भनेर उल्लेख गरिएको छ ।
साँझ परेपछि उनीहरु लुम्बिनीमा रहेको होटल बुद्ध माया गार्डेनमा बसे । भैरहवामा रहेको होटल पवन इन्टरनेसनलका संचालक अजय हलुवाईले आफ्नो व्यक्तिगत परिचयको आधारमा त्यस होटेलमा बस्ने व्यवस्था मिलाएको पाइएको छ ।
अध्यागमन ऐनमा राहदानी र भिसा नभएको विदेशीलाई कसैले पनि नेपालभित्र प्रवेश र प्रस्थान गराउन वा होटेल-घरमा भाडामा राख्न नपाइने उल्लेख छ । ती पर्यटकका लागि होटलका कोठाहरु हलुवाईले बुकिङ गराएको होटल बुद्ध माया गार्डेनका प्रबन्धक लुरु थापाले बताए । उक्त टोलीका ४६ जना सो होटलमा बसे पनि बाँकी दुइ जना कहाँ बसे भन्ने खुल्न सकेको छैन ।
होटेलमा बस्दा भियतनामी टोलीले आफ्नो व्यक्तिगत विवरण समेत होटललाई दिएका छैनन् । आफुले टोलीको कमान्डरसँग उनीहरु सबैको नामवाली र राहादानी नम्बर माग्दा समेत नदिएको प्रबन्धक थापाको दाबी छ । होटेलको दर्ता फाराममा टोलीको कमाण्डर रहेकी महिला लिइन क्युले आफ्नो नाम नलेखाई अर्का व्यक्ति नेगो थि दीको नाम लेखाएको समेत पाइएको छ ।
उनीहरु भैरहवा भन्सार कार्यालयको पछाडीको बाइपास बाटो हुदै खेतैखेत सुनौली बसपार्क पुगेका थिए । त्यसपछि सुनौली क्षेत्रमा रहेको बर्मा मन्दिर अर्थात चन्द्रमणि बौद्ध बिहारमा रात बिताए । बिहान भएपछि ७ वटा सानो गाडी भाडामा लिएर भारतको कुशीनगर गए ।
लुम्बिनीबाट काठमाडौं
२९ फेबु्रअरी अर्थात् फागुन १७ गते बिहान साढे ६ बजे उनीहरु त्यहाँबाट काठमाडौका लागि हिँडे । साँझ काठमाडौँ पुगे । काठमाडौँमा पनि हलुवाईले नै उनीहरुलाई होटलमा बस्ने व्यवस्था मिलाएका थिए ।
फागुन १८ गते त्यो टोली काठमाडौंमै बस्यो । १९ गते टोली पुन भैरहवा नाकाबाट भारत प्रवेश गर्नका लागि साँझ करिब साढे ५ बजे भैरहवा नाकामा आइपुग्यो । सिङ्गल इन्ट्री भिसा भएकाले उनीहरु भारतबाट मात्रै आफ्नो देश फर्किन सक्थे ।
बेलहिया अध्यागमनबाट भारत छिर्न खोज्दा एसएसबीले उनीहरुलाई रोकेर चेकजाँच गर्यो । तर, उनीहरुको राहदानीमा नेपालबाट प्रस्थान गरेको अनुमति नपाइएपछि एसएसबीले साँझ ६ बजे उनीहरुलाई पुन नेपालमा फर्काइदियो ।
एसएसबीले पुन नेपालमा फर्काएपछि उक्त टोली अध्यागमन कार्यालय अगाडि बसमै घण्टौँसम्म बसिरहेको सिसिटीभी फुटेजमा देखिन्छ । तर बेलहिया अध्यागमन कार्यालयले उनीहरुलाई कुनै किसिमको सोधपुछ गरेन ।
स्रोतका अनुसार एसएसबीले फर्काएपछि भारतको सुनौली अध्यागमन कार्यालयका प्रमुखले नेपालको बेलहिया अध्यागमन कार्यालय प्रमुखलाई उनीहरुको राहदानीमा प्रस्थान छाप लगाइदिनका लागि आग्रह गरेका थिए । बेलहिया प्रमुखले आफुले उनीहरुको राहदानीमा नेपाल आगमनको (एराइभल) छाप नलगाएको कारण प्रस्थान गरेको छाप लगाउन नमिल्ने जवाफ फर्काएका थिए ।
त्यसपछि ती पर्यटक आपतमा परे । त्यसपछि उनीहरुलाई नेपाल ल्याएको युनि टप टुर्स एन्ड ट्राभल्सका संचालक सुबोध माथुरले हलुवाइलाई फोन सम्पर्क गरेर टोलीलाई सहयोग गरिदिन आग्रह गरे । हलुवाईले बेलहियामा रहेको होटल प्लाजाका सञ्चालक श्रीचन्द्र गुप्तामार्फत उनीहरुलाई बेलहियाको दुई वटा होटेलमा बस्ने व्यवस्था मिलाए ।
हलुवाईले आग्रह गरेपछि आफुले बस्ने व्यवस्था मिलाइदिएको सञ्चालक गुप्ताले अनलाइनखबरलाई बताए ।
ती पर्यटकहरु बेलहियाको होटल होलिडे इन एन्ड लज र होटल प्रकाश एण्ड प्रकाशमा बसे । उनीहरु हलुवाई र होटल प्लाजाका सञ्चालक गुप्ता मार्फत आफ्नो होटेलमा बसेको होटल होलिडे इन एन्ड लजका संचालक विष्णु शर्माले बताएका छन् । हलुवाई र गुप्ताले आफ्नो नाममा बुकिङ्ग गराएकाले विदेशी नागरिकको कागजात नमागेको उनको भनाइ छ । विदेशी टोली होटलमा राति करिब साढे ८ बजेतिर आएको र राति नै २ बजेर ३५ मिनेटमा होटलबाट निस्किएको शर्मा बताउँछन् ।
होटल प्रकाश एन्ड प्रकाशका संचालक कृष्ण अचार्यले भने आफ्नो होटलमा २१/२२ जनाको विदेशी टोली राति करिब साढे ११ बजे आएको र बिहान करिब साढे ५ बजे गएको दावी गरे ।
लगेज होटलमै छाडेर टाप
सो टोली होटलबाट गयो, तर आफ्नो लगेज होटलमै छाडे । किनकी उनीहरुलाई रातको समयमा फिल्मी शैलीमा बोर्डर क्रस गर्नु थियो । बोर्डर पार गर्नका लागि मात्र उनीहरुले ३ हजार डलर खर्च गरेको स्रोतको दावी छ । यसमा भारतको सुनौली अध्यागमनका कर्मचारी र सुनौलीका ८ व्यक्तिहरुले उनीहरुलाई सहयोग गरेको स्रोतको दावी छ ।
उनीहरु भैरहवा भन्सार कार्यालयको पछाडीको बाइपास बाटो हुदै खेतैखेत सुनौली बसपार्क पुगेका थिए । त्यसपछि सुनौली क्षेत्रमा रहेको बर्मा मन्दिर अर्थात चन्द्रमणि बौद्ध बिहारमा रात बिताए । बिहान भएपछि ७ वटा सानो गाडी भाडामा लिएर भारतको कुशीनगर गए ।
उनीहरु सुनौली क्षेत्रको बिहारबाट युपी ५२ एच ८६३४, युपी ५३ एटी ४४९४, (इन्डीका गाडी), युपी ५३ एटी ११५०, युपी ५६ टी ०२०९, युपी ५६ टी ०२४३, युपी ५६ टी ०४८८, (बोलेरो गाडी), र युपी १६ टीसी ०३६० (आर्टिका) नम्बरको गाडीमा कुशीनगर गएका थिए । उनीहरुको दिल्लीको इन्दिरा गान्धी विमानस्थलबाट आफ्नो मुलुक फर्किनका लागि मार्च ८ अर्थात फागुन २५ गतेको प्लेन टिकट थियो ।
बेलहियाको होटेलमा रहेको लगेज एक व्यक्तिले आफ्नो भिसा देखाएर मुख्य नाकाबाट मार्च ४ तारिख अर्थात फागुन २१ गते लगेका छन् । ति व्यक्तिले लगेज लैजाने क्रममा भारतीय एसएसबीले पनि कुनै रोकटोक गरेन ।
लगेज भारतमा पुर्याउनका लागि होटेल प्लाजाका संचालक गुप्ताले सहयोग गरेका थिए । हलुवाईको आग्रहमा उनले सहयोग गरेको आशंका गरिएको छ । हलुवाई युनि टाप टुर्स एण्ड ट्राभल्ससँग १५ वर्षदेखि काम गर्दै आइरहेका छन् ।
यस विषयमा हलुवाइले अनलाइनखबरसँग भने, ‘पर्यटक आए र गए । मैले सहयोग मात्र गरेको हुँ । तर मैले कतै, कुनै होटलमा बस्न व्यवस्था मिलाएको छैन ।’
के भन्छ एसएसबी ?
विदेशी नागरिकको जम्बो टोलीलाई मार्च २ का दिन चेकजाँच गर्दा राहदानीमा डिपार्चर छाप नरहेकाले नेपाल फर्काएको एसएसबी सुनौलीका सहायक कमाण्डर सौरव मालवियाले बताए । नेपालबाट प्रस्थान अनुमती नलिएको कुनै पनि विदेशी नागरिकलाई भारतमा प्रवेश गर्न नदिइने उनको भनाई छ ।
यता बेलहिया अध्यागमन कार्यालयका प्रमुख आनन्द पौडेलले यो विषयमा आफुहरुलाई कुनै जानकारी नभएको बताएका छन् । फागुन १६ गते बेलहिया नाकाबाट कोही अमेरिकी नागरिक नेपालमा नआएको उनले बताए ।
यस घटनामा युनि टप टुर्स एन्ड ट्राभल्सको पनि कैफियत देखिएको छ । पटक-पटक तेस्रो मुलुकका पर्यटकलाई नेपालमा ल्याइराख्ने युनि टपले बिना भिसा नेपालमा तेस्रो मुलुकका नागरिकहरुलाई गाडीमा नेपाल पठाएको देखिन्छ । युनि टपका सञ्चालक सुबोध माथुर हुन् । माथुर पहिला विदेशी नागरिकलाई गाइड गर्दथे । अहिले भारतको कुशिनगर, बनारस लगायत स्थानमा होटलका साथै दर्जर्नौ बसका धनी हुन् ।
अध्यागमन ऐनमा के छ ?
नेपालको अध्यागमन ऐनअनुसार आधिकारिक राहदानी र भिसा नभएको विदेशीलाई नेपालभित्र प्रवेश र प्रस्थान गराउन पाइदैन । कुनै पनि एजेन्सीले उनीहरुलाई आफ्नो होटेल वा घरमा भाडामा राख्न वा कुनै सेवा उपलब्ध गराउन समेत नपाइने ऐनमा उल्लेख छ ।
यदी कसैले यसको उल्लंघन गरेमा मतियार (दोषी) लाई जरिवाना तथा कैद सजायँको व्यवस्था छ ।
कोई टिप्पणी नहीं:
एक टिप्पणी भेजें