विश्व बैंकले सिंचाई परियोजनाका लागि तीन अर्ब ३० करोड सहयोग गर्ने

काठमाडौं,१ कार्तिक। विश्व बैंकले रानी जमरा कुलरिया सिँचाइ परियोजनामा पहिलो चरणको आधुनिकीकरणका लागि नेपाललाई रु तीन अर्ब ३० करोड सहयोग गर्ने भएको छ। अर्थ मन्त्रालयका सचिव कृष्णहरि बाँस्कोटा र विश्व बैंकका आवासीय प्रतिनिधि इलोन गाल्डस्टेनबीच उक्त सहयोग सम्बन्धी सम्झौता पत्रमा मंगलबार अर्थ मन्त्रालयमा हस्ताक्षर भएको हो।
रकममध्ये रु एक अर्ब ८० करोड ऋण सहयोग र बाँकी रु एक अर्ब ५० करोड अनुदान सहयोग रहेको छ। चौध हजार ३०० हेक्टर सिँचाइ गर्ने क्षमता रहेको उक्त परियोजनाको इनटेक फिडर र शाखा नहरको विस्तार गरी दिगो कृषि उत्पादन वृद्धि गर्ने लक्ष्य रहेको छ। सिँचाइ मन्त्रालय र विश्व बैंकद्धारा संयुक्त रुपमा परियोजनाको कार्यान्वयन अघि बढाइने र आगामी सन् २०१६ सम्ममा सो परियोजना पूरा गर्ने लक्ष्य राखिएको छ।
कार्यक्रममा सचिव बाँस्कोटाले नेपालको आर्थिक र सामाजिक विकासमा सहयोग पुर् याएकामा नेपाल सरकारको तर्फबाट विश्व बैंकप्रति आभार व्यक्त गर्नुभयो।