काठमाडौं, कार्तिक १४ - प्रमुख तीन दलका अध्यक्षले शान्ति र संविधान अविलम्ब टुंग्याउने प्रतिवद्धता जनाएका छन् ।
राजधानीको भृकुटीमण्डपमा सोमबार माओवादीले आयोजना गरेको चियापानमा माओवादी अध्यक्ष पुष्पकमल दाहाल, कांग्रेस सभापति सुशील कोइराला र एमाले अध्यक्ष झलनाथ खनालले पछिल्ला वार्ताहरु सकारात्मक भइरहेकोसमेत जानकारी दिए ।
'ठूलो दलको हैसियतले जसरी भए पनि शान्ति प्रक्रिया र संविधान निर्माण पूरा गरेरै छाड्छु,' माओवादी अध्यक्ष दाहालले भने, 'सवैले आफ्नो ढंगले सोच्नुपर्छ ।' उनले पार्टीभित्र पछिल्ला समयमा भएका कृयाकलापले सवैलाई दुःखी बनाएको भन्दै तर पार्टी फुट्न नदिने प्रतिबद्धतासमेत दोहोर्याए ।
कांग्रेस सभापति कोइरालाले तीन दलका वार्ताहरु सहमति नजिक पुगेको जानकारी दिए । 'हामी हदैसम्मको लचक भएर शान्ति र संविधान निर्माणको जनताको चाहना पूरा गरेरै छाड्छौं,' कोइरालाले भने ।
चियापानमा एमाले अध्यक्ष झलनाथ खनालले शान्ति र संविधानका लागि प्रमुख दलहरुबीच न्यूनतम सहमतिको आवश्यकता औंल्याए । 'सवैको अर्जुनदृष्टि शान्ति र संविधानमा लगाउनुपर्छ,' उनको भनाइ थियो । खनालले तीन दलका वार्ता परिणाममुखी भएको भन्दै सहमति हुने विश्वास व्यक्त गरे ।
मधेसी जनअधिकार फोरम (लोकतान्त्रिक)का अध्यक्ष विजयकुमार गच्छदारले दलहरुसमक्ष शान्ति र संविधानको कार्यभार पूरा गर्नुको विकल्प नरहेको बताए ।
नेपाल संवत् र छठ तथा दीपावलीको अवसरमा आयोजना गरिएको चियापानमा प्रधानमन्त्री बाबुराम भट्टराई, सभामुख सुवासचन्द्र नेम्वाङलगायत दलका नेता, सभासद्, कुटनीतिक नियोगका अधिकारीहरु, सरकारी अधिकारी, उद्योगी, पत्रकार, कलाकार, पार्टी कार्यकर्ता र सर्वसाधारको सहभागिता थियो ।
आगन्तुकलाई अध्यक्ष दाहाल, उपाध्यक्ष मोहन वैद्य, प्रधानमन्त्री एवं पार्टी उपाध्यक्ष भट्टराई, नारायणकाजी श्रेष्ठ, सीपी गजुरेल, पोष्टबहादुर बोगटीलगायतले लहरै उभिएर स्वागत गरेका थिए ।
कोई टिप्पणी नहीं:
एक टिप्पणी भेजें