माओवादी नेताले खाए पीएको पारिश्रमिक

माधव ढुङ्गेल, काठमाडौं, कात्तिक १४ - एकीकृत नेकपा माओवादी पोलिटब्युरो सदस्यसमेत रहेका सभासद् हितमान शाक्यले पारिश्रमिक नदिएको भन्दै उनका स्वकीय सचिव नवीन तामाङले संविधानसभा सचिवालयमा निवेदन दिएका छन्। निवेदनमा शाक्यले आफूलाई दिनुपर्ने ८१ हजार २ सय ६२ रूपैयाँ नदिएको उल्लेख गरेका छन्।  'तलब उपलब्ध गराइपाऊँ' भन्ने व्यहोराको पत्रमा तामाङले तीन महिना मासिक ४ हजारका दरले मात्र पारिश्रमिक दिएको त्यसपछि नदिएको उल्लेख छ। तामाङ ०६८ बैशाखदेखि स्वकीय सचिव भएका थिए। त्यसअघि वाईसीएलका दिलिप प्रजापतिका सहयोगी थिए।

विवरण अनुसार, बैशाख, जेठ र असार तीन महिना चार हजारका दरले पारिश्रमिक पाए। संसद् सचिवालयबाट भने सभासद् शाक्यले स्वकीय सचिवको पारिश्रमिकबापत प्रतिमहिना १३ हजार ९० रूपैयाँ बुझेका छन्।

साउनमा कर्मचारीको तलब वृद्धिसँगै स्वकीय सचिवको पारिश्रमिक बढेर मासिक १८ हजार रुपैयाँ पुगेको छ। त्यसयता तामाङले एक पैसा पनि पाएका छैनन्। 'पद स्वकीय सचिव भने पनि मैले उहाँको सेक्युरिटी गार्ड, ड्राइभरको पनि काम गरें,' तामाङले भने, 'मलाई चार हजार रुपैयाँमात्र दिएपछि कम्तिमा मैले पाउने भत्ताको आधा भए पनि दिनुस् भनें। त्यसपछि पैसा दिनै छाड्नु'भो।'

पैसा दिन पटक-पटक आग्रह गरेपछि असोज २४ गते सभासद् शाक्यले मौखिक रूपमा स्वकीय सचिवबाट हटाएको जानकारी दिएको तामाङले निवेदनमा उल्लेख गरेका छन्। पार्टीभित्रको अन्तर्विरोधका कारण त हटाइएको हैन भन्ने प्रश्नमा तामाङले आफू पनि बैद्य समूहकै समर्थक रहेको बताए। 'मलाई काम लगाइयो तर पारिश्रमिक दिइएन, यो श्रम शोषण हो', तामाङले भने, 'मलाई सडकमा पुर्‍याउने काम भयो।' उनले आफूले ड्राइभरको काम खोजिरहेको पनि बताए।
सभासद् शाक्यसँग यसबारे जानकारी माग्न खोज्दा सम्पर्क हुन सकेन।