काठमाडौं, २ कार्तिक। नेपाली उद्योग ब्यापार क्षेत्रका अग्रणी ब्यक्तित्वहरुले प्रधानमन्त्री डा. बाबुराम भट्टराईको विहिबारबाट सुरु हुने चार दिने भारत भ्रमणको क्रममा उर्जा, ब्यापार र लगानी सुरक्षासम्बन्धी सम्झौतालाई आफूहरुले महत्वकासाथ अगाडि बढाउने बताएका छन्। रिपोर्टस क्लबले प्रधानमन्त्रीको भारत भ्रमणको सन्दर्भमा नेपालबाट उठाउनु पर्ने आर्थिक एजेण्डाको विषयमा आयोजना गरेको साक्षात्कारमा बोल्दै नेपाल चेम्बर अफ कमर्सका अध्यक्ष सुरेशकुमार बस्नेतले नेपालमा लगानी भित्राउन नेपाली उद्योगी सरह भारतीय लगानी कर्ताहरुलाई पनि सुरक्षाको प्रत्याभूति आवश्यक रहेको भन्दै लामो समयदेखि थाती रहँदै आएको लगानी सुरक्षा सन्धीमा हस्ताक्षर हुनु पर्नेमा जोड दिनुभयो।
कार्यक्रममा बस्नेतले नेपालको ब्यापार घाटा कम गर्ने प्रमुख बाटो उर्जाको निकासी नै भएकोले भविष्यलाई मध्यनजर गरेर उर्जा ब्यापार सम्झौता आवश्यक भएको बताउनुभयो । यद्यपि उहाँले अहिले नेपालले किनेको मुल्यमा नै पछि भारतले नेपालबाट विद्यूत खरिद गर्ने ब्यवस्था हुनु पर्नेमा जोड दिनुभयो।
त्यस्तै भ्रमणको क्रममा चेम्बरले बनस्पती ध्यू तामा सहित चार बस्तुमा रहेको निकासी प्रतिबन्घ हटाउने, भन्सारमा लाग्ने गरेको अतिरिक्त र दोहोर कर प्रणालीको अन्त्य, विशाखापटनम बन्दरगाहमा पहुँच र भारतीय ५ सय र १ हजार मुल्यको नोटमा रहेको प्रतिबन्ध अन्त्यको विषयलाई पनि भ्रमणको क्रममा उठाउने उहाँले बताउनुभयो।
साक्षात्कारमा सभासद एवम उद्योगी विनोद चौधरीले आन्तरिक तरल राजनीति कारण महत्वपूर्ण राजनीतिक विषयमा सम्झौता हुन नसक्ने भएकोले प्रधानमन्त्रीको भ्रमणलाई आर्थिक एजेण्डामा केन्द्रीत गर्नु पर्ने भन्दै ब्यापार घाटालाई कम गर्न निकासी जन्य उद्योगलाई विशेष सुविधा दिने सम्बन्धी लगानी सुरक्षा सम्झौता गर्नु पर्नेमा जोड दिनुभयो । उहाँले भारतले दिएको सुविधा भन्दा एक कदम माथि उठेर भारतीय लगानी भित्राउनु पर्ने बताउनुभयो। उहाँले विशेष सुविधासहित सरकारले विषेश आर्थिक क्षेत्रको अवधारणालाई अगाडि बढाउने विषयमा पनि भ्रमणको क्रममा विशेष कुराकानी हुनु पर्नेमा जोड दिनुभयो। उहाँले प्रधानमन्त्रीको भ्रमण सदभाव भ्रमण भएकोले लगानीमा विश्वास बढाउने काम हुनु पर्नेमा जोड दिनुभयो।
सभासद एवम उद्योगी दिवाकर गोल्छाले पनि नेपालमा आर्थिक विकासकोलागी विदेशी लगानी आवश्यक रहेको भन्दै त्यसकोलागी नेपाल र भारतवीच लगानी सुरक्षा सम्झौता गर्नुपर्ने बताए । उहाँले क्वाराईन्टेन समस्या विशाखापटनम र पारादिप बन्दरगाहमाथिको पहुच उर्जा सम्झौता हुनु पर्नेमा जोड दिनुभयो । उहाँले लगानीमा अविश्वासको बातावरण रहेको भन्दै दुबैतर्फलाई विश्वास हुने गरी विश्वासको बातावरण निर्माण गर्न अतिआवश्यक भएकोमा जोड दिए । उहाँले नेपाललाई फाईदा जनक महकाली सन्धी जस्ता विगतमा भएको सम्झौता कार्यान्वयलाई पनि प्राथमिकताकासाथ नेपालले उठाउन सके भ्रमण फलदायी हुने विश्वास ब्यक्त गर्नुभयो।
नेपाल घरेलु तथा साना उद्योग महासंघकी अध्यक्ष लता प्याकुरेलले घरेलु उद्योगलाई संरक्षण गरेर नै चिन र भारत अगाडि बढेको दावी गर्दै प्रविधि हस्तान्तरण संरक्षणमा जोड दिनु पर्ने बताउनुभयो। उहाँले प्राकृतिक रेशा, जडिबुटी, बहुमुल्य पत्थर र सुगन्धलाई प्रसोधन गरेर निकासी गर्न सके ब्यापार घाटा कम हुने भन्दै त्यस्ता उद्योगको विकासकोलागी महत्वपूर्ण साझेदारी हुनु पर्ने तर्क गर्नुभयो। उहाँले भन्सार विन्दुको बृद्धि र क्यारेन्टाईन समस्या समाधानलाई पनि एजेण्डा बनाउन आग्रह गर्नुभयो।
राष्ट्रिय उद्योग ब्यापार संघका अध्यक्ष श्याम पाठकले प्रधानमन्त्री डा बाबुराम भट्टराईले नेपाल र भारतको सम्बन्ध बुझेको हुनाले भ्रमण सफल हुने विश्वास ब्यक्त गर्दै नेपालको विकासमा भारतको उदारता आवश्यक रहेकोमा जोड दिनुभयो।
कोई टिप्पणी नहीं:
एक टिप्पणी भेजें