नेपालगन्ज, कार्तिक २ - सभासद वादशाह कुर्मीले दुई वर्षदेखि यहाँकी एक एकल महिलाको करोडौंको घरसम्पत्ति कब्जा गरेको पीडित पक्षले गुनासो गरेका छन् । सभासदका आफन्तले प्रहरी, प्रशासनमा उजुरी दिए ज्यान मार्ने धम्की दिएपछि एकल महिला आफन्तको शरणमा पुगेकी छन् । सोमबार उनले स्थानीय प्रशासनमा 'जीउ, धन सम्पत्तिको सुरक्षा गरी आवश्यक कारबाही गरिपाउँ' भनी निवेदन दिएकी छन् ।
परसपुर ९ की ५० वर्षीय एकल महिला निर्मला कुर्मीले सभासद वादशाहले सहयोगी लगाएर परसपुर ९ मा रहेको घरसम्पत्ति कब्जा गरेको बताइन् । उनले प्रमुख जिल्ला अधिकारी कृष्णचन्द्र घिमिरेलाई भेटेर घरजग्गा कब्जा गर्ने सभासद कुर्मीलाई कारबाही गरी घर र सम्पत्ति निर्वाध रूपमा उपभोग गर्न पाउने व्यवस्था मिलाइदिन आग्रह गरिन् । प्रजिअ घिमिरेले 'सम्पत्ति लुटपाट गर्ने व्यक्तिलाई झिकाएर पेस गर्न' निवेदनमा तोक लगाएका छन् । सभासद कुर्मी कांग्रेसका समानुपातिकतर्फका सभासद हुन् ।
घरजग्गा कब्जापछि भारतीय आफन्तको घरमा शरण लिएर बसेको उनले बताइन् । 'मेरो सम्पत्ति हडप्न सभासदले मेरै घरमा मलाई बस्न दिएका छैनन् । दुई वर्षदेखि खेतको अन्नबाली पनि उनैले खाँदै आएका छन्,' उनले भनिन् । तर सभासद कुर्मीले भने आरोपको खण्डन गरेका छन् । जग्गा कब्जामा नलिएको उनले दाबी गरे । 'असहाय महिलाको सम्पत्ति धेरै भएकाले जालझेल गरेर कसैले नखाओस् भनी सहयोग गर्न खोजेको हुँ,' उनले भने ।
'गाउँकी एकल महिलाको सम्पत्ति खान धेरै फटाहाहरू लागेका छन्,' उनले भने, 'अरूको सम्पत्ति म किन कब्जा गरुँला ।' सभासद कुर्मीले निर्मला आफैं घरबाट भाग्दै हिँड्ने गरेको आरोप लगाए । तर निर्मलाले भने सभासदका मानिसले आफूलाई यातना दिने गरेका कारण घरमा बस्न सक्ने अवस्था नभएको बताइन् । न्याय पाउने आशामा दुई वर्षदेखि प्रशासन धाइरहेकी निर्मलाले जीउधनको सुरक्षाका लागि आग्रह गरेकी छन् ।
निर्मलाका श्रीमान् महालुको ८ वर्षअघि मृत्यु भएको थियो । छोरा १५ वषर्ीय रामसागर र ८ वषर्ीय सुरेशको २ वर्षअघि मृत्यु भएपछि उनी एक्लिएकी हुन् । रामसागरको नाममा डेढ र श्रीमानको नाममा साढे ३ बिघाभन्दा बढी जग्गा छ । त्यही जग्गा सभासदले कब्जा गरेको आरोप उनले लगाइन् । श्रीमान् र छोराहरूको मृत्युपछि सभासद कुर्मीले आफ्नै घरमा बस्न दबाब दिएको उनले बताइन् । तर आफ्नो कुनै नाता नपर्ने भन्दै बस्न नमानेपछि उनले घरजग्गा कब्जा गर्न लगाएको निर्मलाको दाबी छ ।
'दुई वर्षदेखि मेरो घरमा भारतीय मानिस राखिएको छ । जग्गाको आयस्ता खाना पाएको छैन,' उनले भनिन्, 'खेतमा रहेको बबुराको रूख पनि काटेर बेचिसकें ।' अन्यायमा परेको उजुरी दिँदा सभासद कुर्मीेले आफूलाई कुटपिट गर्ने गरेको निर्मलाको गुनासो छ । सभासद कुर्मीले निर्मलाको नागरिकता र जग्गाको लालपुर्जासमेत खोसेका थिए । तर स्थानीय प्रशासनको सहयोगमा ती कागज फिर्ता गरिएको छ । घरजग्गा सभासदकै कब्जामा रहेका कारण मृत्यु भइसकेका श्रीमान् र छोराको नाममा रहेको सम्पत्ति निर्मलाले नामसारी गर्न सकेकी छैनन् । गाविस सचिवले नामसारी सिफारिस नदिएको उनले बताइन् । प्रमुख जिल्ला अधिकारी घिमिरेले गाविस सचिवलाई नियमअनुसार नामसारी गर्ने प्रक्रिया अघि बढाउन भनेका छन् ।
निर्मलाका दुई छोरा बिरामी हुँदा शिक्षण अस्पताल नेपालगन्जमा भर्ना गरिएको थियो । त्यतिबेला सभासद कुर्मीले 'पैसा जति चाहिन्छ लिएर जाऊ तर तमसुक गर' भनेका थिए । तर निर्मलाले तमसुक गर्न नमानेपछि कुटपिट गरी सबै कागज खोसेको उनको भनाइ छ । सभासदले दुःख दिएपछि निर्मलाले गाविस, जिल्ला प्रशासन कार्यालय, राष्ट्रिय मानव अधिकार आयोगलगायतमा उजुरी दिइसकेकी छन् । तर उनले न्याय नपाएपछि सञ्चारकर्मीहरूलाई भेला गराई आफ्ना कुरा राखेकी हुन् । निर्मलाले एक वर्षअघि पनि जिल्ला प्रशासन कार्यालय, बाँकेमा उजुरी दिएकीथिइन् । तर प्रशासनले सभासदमाथि कारबाही गर्न नमिल्ने जनाएर पन्छिएको आरोप उनको छ ।
कोई टिप्पणी नहीं:
एक टिप्पणी भेजें