प्रधानमन्त्री भट्टराई भारतमा

   नयाँदिल्ली, कार्तिक ३ - भारतको चार दिने सदभावना भ्रमणका लागि प्रधानमन्त्री बाबुराम भट्टराई ३७ सदस्यीय टोलीको नेतृत्व गर्दै बिहीबार अपरान्ह नयाँदिल्ली आएका छन् ।
वायु सेवा निगमको विमानबाट नयाँदिल्ली आएका भट्टराईलाई विदेश मन्त्रालयका शिष्टाचार महापाल रुचिरा कम्बुज र नेपालका लागि भारतीय राजदूत जयन्तप्रसादले स्वागत गरे । भारतीय समकक्षी मनमोहन सिंहको औपचारिक निमन्त्रणमा प्रधानमन्त्री दिल्ली आएका छन् । 
दिल्लीमा रहँदा भट्टराईको भेटघाट बिहीबारबाट सुरु भएपनि शुक्रबारबाट महत्त्वपूर्ण राजनीतिक भेटघाट हुनेछ । भट्टराईको भ्रमण कात्तिक ३ देखि ६ गतेसम्म हुने छ । 
प्रधानमन्त्री भट्टराईले आफ्नो भ्रमण सदभावना भ्रमण मात्र भएको बताएका छन् । उनले विवादित कुनै पनि विषयमा सम्झौता नहुने जनाएका छन् ।