विवादास्पद अभिव्यक्ति दिने रक्षामन्त्री शरत् सिंह भण्डारीलाई मन्त्रीपदबाट हटाएपछि फोरम लोकतान्त्रिक भित्रको विवाद झन् चर्किएको छ । फोरम लोकतान्त्रिकको राजनीतिक समितिले मन्त्रीबाट हटाएपछि रुष्ट बनेका भण्डारीले हिज जागरण आन्दोलनको घोषणा गर्नुभएको छ ।
आफूलाई पार्टी कार्यालय सानेपामा बसेको बैठक बहिष्कार गर्दै बाहिरिएका नेता भण्डारीले काठमाण्डौंमा पत्रकार सम्मेलन गरेर स्पष्टिकरणको मौका समेत नदिई अन्यायपूर्ण किसिमले हटाइएको भन्दै आन्दोलनमा जाने चेतावनी दिनु भएको हो । भण्डारीले आफूलाई अन्यायपूर्ण ढंगले हटाएको र संसदमा आफ्ना कुरा राख्न समेत नदिएको बताउनुभयो । ‘यस्तो महत्वपूर्ण निर्णय केन्द्रीय समितिबाट हुनुपर्र्यो । मैले केन्द्रीय समितिको बैठक पनि माग गरे’ उहाँले भन्नुभयो-’पार्टी भित्र लोकतन्त्र कायम गर्न नै हामीले पार्टीको नाम लोकतान्त्रिक राखेका थियौं, तर पार्टी पनि विचलित भयो ।’ भण्डारीले पार्टी नछाड्ने प्रष्ट पार्नुभयो ।
भण्डारीलाई मन्त्रीबाट हटाउने निर्णयको ड्राफ्ट बैठकमा लेख्न थालेपछि भण्डारी पक्षधर केही नेताले बैठक बहिष्कार गरेका थिए । तर बैठकको निर्णय सुनाउने क्रममा फोरम लोकतान्त्रिकका अध्यक्ष तथा गृहमन्त्री विजयकुमार गच्छेदारले विधान सम्मत ढंगले निर्णय गरेको जानकारी दिँदै भन्नुभयो 'निर्णय विरुद्ध उत्रिनेलाई पार्टी अनुशासन विपरित काम गरेकोमा कारवाही हुने छ ।' उहाँले शान्तिप्रक्रिया र संविधान निर्माणमा सहयोग राष्ट्रिय सहमतिको निर्माण लगायतका कारण भण्डारीलाई हटाउने निर्णय गरेको बताउनुभयो ।
कोई टिप्पणी नहीं:
एक टिप्पणी भेजें