हटाइएका रक्षामन्त्रीद्वारा राष्ट्रघातको मुद्दा चलाउन चुनौती

काठमाडौं, असोज २ (नागरिक)- प्रधानमन्त्री बाबुराम भट्टराईले बुधबार हटाएका रक्षामन्त्री शरदसिंह भण्डारीले आफ्नो अभिव्यक्ति राष्ट्रघाती नभएको दावी गरेका छन्। 'मैले विभेदविरुद्ध आवाज उठाएको हुँ', पत्रकार सम्मेलन गर्दै उनले भने- 'म एमाले र कांग्रेसलाई राष्ट्रघातको मुद्दा चलाउन चुनौती दिन्छु।' भण्डारीको दल मधेसी जनअधिकार फोरम लोकतान्त्रिकको सिफारिशमा प्रधानमन्त्रीले उनलाई आजै पदमुक्त गरेका थिए। पार्टीको निर्णय तथा प्रधानमन्त्री उनले असन्तुष्टि जनाए। पार्टीको निर्णयविरुद्ध चरम असन्तुष्ट देखिएका उनले मधेस जागरण अभियान गर्ने भएका छन्। 'मूल बाटोबाट पार्टी विचलित भएको छ, उनले भने- 'यसको अन्तिम फैसला जनताले गर्छन्।'


आफ्नो अभिव्यक्तिको प्रतिक्षीहरुले गलत अर्थ लाएको भन्दै उनले आफ्नो पूरै अभिव्यक्ति हेर्न आग्रह गरे। 'माओवादी र मेरो पार्टीले नै असोज ९ गते रिपोर्टर्स क्लबमा बोलेको अभिव्यक्ति गलत नभएको ठहर गरिसकेको अवस्थामा मैले किन राजीनामा दिने ? मैले बोलेको पूरै अंश हेर्नोस्', उनले भने।

प्रधानमन्त्रीले पदमुक्त गर्दा संसदीय परम्पराको आधारभूत मान्यता पनि पूरा नगरेको भन्दै उनले भने- 'संसदीय प्रणालीमा आरोप लागेका मन्त्रीलाई स्पष्टिकरण सोध्ने र चित्त नबुझे मात्रै अरु प्रक्रिया अघि बढाउने गरिन्छ। मलाई त्यो अवसर दिइएन।'

आफ्नो अभिव्यक्ति वस्तुपरक भएको जिकिर गर्दै उनले त्यसलाई पुष्टि गर्न एउटा उखान समेत सुनाए। 'जाडो मौसममा एकजना मान्छे सडकमा पातलो लुगा लाएर हिँडिरहेको थियो। मैले उनलाई यस्तो चिसोमा पातलो कपडा लाउँदा सर्दी लागेर निमोनिया होला। निमोनियाले मर्ने पनि अवस्था आउला भनेर सचेत गराएँ। मैले यसरी भन्दा प्रतिपक्षीहरुले त्यो मान्छे मैले मारेँ भनेर गैरजिम्मेवारीपूर्ण आरोप लगाए' पत्रकार सम्मेलनमा उनले भने।