एक हजार १ सय १२ कुलपुत्रलाई दीक्षा प्रदान गरिने

काठमाडौं, कात्तिक २-विश्वभर शान्तिको कामना गर्दै बुद्ध जन्मभूमि नेपालमा बुद्धधर्मको प्रवर्द्धन तथा बौद्ध चेतनाको विश्वभरि अभिवृद्धि र निरन्तरता दिने अभिप्रायले नेपाल कुलपुत्रलाई दीक्षा (प्रब्रज्या) कार्यक्रम हुने भएको छ। अखिल नेपाल भिक्षु महासङ्घ र थाइल्यान्डको धम्मकाय फाउन्डेसनको प्रमुख आयोजना तथा इन्टरनेसनल धम्मदायदा एसोसिएसन, नेपालको संयोजकत्वमा रोयल थाई मोनास्ट्री लुम्बिनी, वर्ल्ड फेलोसिप अफ बुद्धिस्ट युथ, रोयल थाई एम्बेसी नेपाललगायत बौद्ध सङ्घसंस्थाको विशेष सहयोगमा नेपालका प्रथम सङ्घमहानायक अग्गमहापण्डित स्व भिक्षु प्रज्ञानन्द महास्थवीरको ११२ औँ जन्मजयन्तीका अवसरमा हुन लागेको सो कार्यक्रम यही कात्तिक २४ देखि मङ्सिर १२ गतेसम्म काठमाडौं र लुम्बिनीमा हुने भएको छ।

इन्टरनेसनल धम्मदायदा एसोसिएसन, नेपालले आज राजधानीमा आयोजना गरेको पत्रकार सम्मेलनमा सोबारे जानकारी दिएको हो।
उक्त अवसरमा एकहजार ११२ नेपाल कुलपुत्रले भागलिने सो दीक्षा समारोहमा मित्रराष्ट्र थाइल्यान्डबाट करिब ६०० सहयोगी र भिक्षुले समेत भाग लिने बताइएको छ।
गौतमबुद्धका पुत्र राजकुमार राहुललाई निग्रोधाराम विहारमा स्वयम् बुद्धले दीक्षित गर्नु भएको यस पवित्र ऐतिहासिक र गौरवपूर्ण थलोलाई उजागर गर्नुका साथै परम्परालाई निरन्तरता दिने, बुद्ध जन्मस्थान लुम्बिनीमा बुद्धधर्मको पुनरुत्थान र पुनःजागरण गर्ने, विश्वमा स्थायी शान्ति स्थापनाका लागि बुद्ध धर्मको प्रचार गर्न, दीक्षित हुने (प्रबर्जित) कुलपुत्र (धर्मदायदा) हरुलाई जीवनको उत्तम ज्ञानहरु सिक्न र व्यवहारमा ल्याउन अवसर प्रदान गर्ने तथा विश्वका सबै बुद्धमार्गीलाई एकताबद्ध गर्ने मूल उद्देश्यअनुरुप कार्यक्रमको आयोजना गर्न लागेको हो।
'विश्वशान्तिका लागि सँगसँगै' भन्ने नारा दिइएको सो कार्यक्रम १८ दिन सम्म हुनेछ। रासस