विमान दुर्घटनामा मृत्यु भएका सबै ६ जनाको शव काठमाडौं लगियो

दिलीप पौडेल, बाग्लुङ,कात्तिक,२-सैनिक बिमान दुर्घटनामा मृत्यु भएका सबै छ जनाको शव काठमाडौं लगिएको छ। प्रहरी, नेपाली सेना,स्थानीयले उद्दार गरेपछि बुधवार साँझ सेनाको हेलिकप्टरबाट शव काठमाडौं लगिएको हो।
दुर्घटनामा सैनिक बिमानका क्याप्टेन दिवाकर कार्की, को-पाईलट विशाल सिंह राठोर, हुम्लाको सिमिकोटस्थित सिंहशार्दुल गणका सैनिक केशवसिंह ऐरी, नेपाली सेनाका चिकित्सक उपसेनानी डा.रविता पाठक, धनगढीमा कार्यरत प्रहरी रामसिंह ऐर, सेनामा कार्यरत मिलन गोतामेको मृत्यु भएको थियो। उनीहरुको शव पोष्टमार्टम र आफन्तलाई बुझाउनको काठमाडौं लगिएको हो।

नेपालगञ्जबाट विरामी लिएर काठमाडौंका लागि उडेको सेनाको आरएएन ४९ विएन २ टि नम्बरको बिमान मंगलवार साँझ बाग्लुङको बोवाङ-९ चौधुलको धुरीमा करिव सवा सात बजे दुर्घटनाग्रस्त भएको थियो।