१० चैत, काठमाडौं । नाकाबन्दीमा गरेको कार्य सम्पादनको मूल्यांकन गर्दै सरकारले एसटीसी ग्यासको मासिक कोटा दुई गुणाले बढाएको छ । नाकाबन्दीपछि बजारमा सरकारी ग्यास कम्पनीको उपस्थितिलाई बलियो बनाउनुपर्ने भन्दै नेपाल आयल निगमले एसटीसी ग्यासको कोटा बढाएको हो । आपूर्ति मन्त्रालयका प्रवक्ता दीपक सुवेदीले आयल निगमलाई कोटा बढाउन मन्त्रायलले निर्देशन दिएको अनलाइनखबरसँग बताए । एसटीसी ब्राण्डको ग्यास सरकारी स्वामित्वको साल्ट ट्रेडिङ कर्पोरेशन लिमिटेडको हो ।
राम्रो काम गरेको ठहर
यसअघि मासिक ४ सय ७८ टन ग्यास पाउने साल्ट ट्रेडिङले अहिले मासिक १ हजार ८ टन पाउन थालेको छ । महिनामा करिब ३३ हजार सिलिन्डरमा ग्यास भर्दै आएको एसटीसीले कोटा बढेपछि झण्डै ७० हजार सिलिन्डरमा ग्यास भर्नेछ । ‘नाकाबन्दीका समयमा अधिकांश ग्यास उद्योगले कालोबजारी गरेको प्रशस्तै सुनियो र देखियो । अझै बजारमा कालोबजारी नरोकिँदा हाहाकार कायमै छ’ आपूर्ति मन्त्रालयका प्रवक्तासुवेदीले भने- ‘तर एसटीसी ब्र्राण्डका उपभोक्ताले अन्यको भन्दा कम सास्ती बेहोरे । पछिल्ला दिनमा एसटीसी ग्यासका उपभोक्तालाई समस्या नभएको देखेपछि कोटा बढाउन पहल गरेका हौं ।’
एसटीसी ग्यासप्रति उपभोक्ता सकारात्मक देखिएकाले कोटा बढाइएको आयल निगमले पनि जनाएको छ । पछिल्ला दिनमा बजारमा एससटीसी ग्यासका न्याँ सिलिन्डरको माग निकै बढेको देखिएको छ ।
अझै कोटा थप्ने क्षमता
अहिले एसटीसीका १ लाख २० हजार सिलिन्डर बजारमा छन् । कोटा बढेपछि अब ३० हजार सिलिन्डर थप्नुपर्ने अवस्था आएको साल्ट ट्रेडिङका प्रवक्ता कुमारराज भण्डारीले बताए ।
पछिल्ला दिनमा एसटीसी ग्यासको नयाँ सिलिन्डर किन्न चाहने उपभोक्ताको संख्या ठूलो देखिएको छ । तर, बजारमा रहेका सिलिन्डर भर्ने क्रम जारी रहँदा एसटीसीले नयाँ उपभोक्तालाई सिलिन्डर बेच्न सकेको छैन ।
एसटीसीको धादिङस्थित ग्यास उद्योगमा कम्युटराइज्ड प्रविधिबाट ग्यास रिफिलिङ गरिन्छ । अहिले ३ वटा नोजलबाट ग्यास भर्ने गरिएको छ । कोटा दोब्बर भएपनि उद्योगलाई काम गर्न समस्या नहुने प्रवक्ता राजभण्डारीले बताए । ‘मासिक २ हजार टनसम्म ग्यासको कोटा भएपनि हामीलाई काम गर्न गाह्रो छैन । त्यतिका लागि पूर्वाधार तयार छ’ प्रवक्ता राजभण्डारीले भने-‘तत्काल अरु ३ वटा नोजल थप्न मिल्ने अवस्था छ ।’
काठमाडौंमा एसटीसीका २ सय ३२ वटा ग्यास डिपो छन् । कोटा बढेपछि ग्यास डिपो पनि थप्ने तयारी गरिएको छ ।
सरकार सकारात्मक
एससटीसी ग्यासका उपभोक्ताले अहिले खाली सिलिन्डर बुझाएको २ दिनभित्रै भरिएको ग्यास पाइरहेको राजभण्डारीको दावी छ । आपूर्ति मन्त्रालयले एसटीसी ग्यासको कोटा अझै बढाएर १५ सय टनसम्म पुर्याउन सकिने बताएको छ ।
‘नाकाबन्दीका बेला लाइनमै बसेर पनि एसटीसीका उपभोक्ताले सहजै ग्यास पाए’ आपूर्तिका प्रवक्ता सुवेदीले भने-बजारमा सरकारी ग्यास कम्पनीको सकारात्मक हस्तक्षेपका लागि पनि एसटीसीलाई बलियो बनाउनुपर्छ । त्यसैअनुरुप ग्यास सिलिन्डर, बुलेट, भर्ने क्षमताका आधारमा अधिकतम कोटा दिन तयार छौं ।’
निजेगका उपभोक्ताले खाली सिलिन्डर बुझाएको हप्तौंसम्म ग्यास नपाएको भन्दै उनले अब मन्त्रालयले अनुगमनलाई थप बलियो बनाउने बताए ।
कोई टिप्पणी नहीं:
एक टिप्पणी भेजें