हङकङ, कार्तिक १५ - चीन भ्रमणमा रहेका प्रधानसेनापति छत्रमानसिंह गुरुङ र चिनियाँ जनमुक्ति सेनाका प्रमुख चेन विङदे बीच सोमबार नेपाली सेनालाई ४ करोड ९० लाख युआन करिब (६० करोड २७ लाख रुपैयाँ) सहयोग दिने सम्झौतामा हस्ताक्षर भएको छ । २०६७ चैतमा नेपाल भ्रमणमा आएका बेला सेना प्रमुख विङदे र प्रधानसेनापति गुरुङबीच जनमुक्ति सेनाले नेपाली सेनालाई १३ करोड युआन सहयोग दिने समझदारी पत्रमा हस्ताक्षर भएको थियो । सोही समझदारी अनुरुप चिनियाँ सेनाले उक्त रकम उपलब्ध गराएको हो । सम्झौतापत्रमा नेपाली सेनाका प्रधानसेनापति गुरुङ र जनमुक्ति सेनाका प्रमुख विङदेले हस्ताक्षर गरेका थिए । मन्त्रिपरिषद्को हालै बसेको बैठकले प्रधानसेनापतिको भ्रमणमा सम्झौतामा हस्ताक्षर गर्न स्वीकृति दिएको हो । सम्झौतामा प्राप्त रकम वीरेन्द्र सैनिक अस्पताललाई आवश्यकीय उपकरण खरीद, तालिम लगायतमा खर्च गरिने उल्लेख छ ।
बेइजिङस्थित चिनियाँ जनमुक्ति सेनाको मुख्यालय बायी भवनमा आयोजित समारोहमा जनमुक्ति सेना प्रमुख विङदेले नेपालमा शान्ति, स्थिरता र विकासले चाडो गति लिओस भनी शुभकामना दिएको बैठकमा सहभागी चीनका लागि नेपाली राजदूत टंक कार्कीले कान्तिपुरलाई बताए । चिनियाँ पक्षले नेपालको एक चीन नीतिको प्रशंसा गर्दै तिब्बतको सुरक्षा मामलामा नेपालले खेलेको भूमिकाका लागि धन्यवाद दिएको राजदूत कार्कीले बताएका छन् । बेइजिङ ओलम्पिकका बेला शान्ति सुरक्षा सुव्यवस्थित गर्न नेपालले पुर्याएको सहयोगका लागि समेत जनमुक्ति सेनाले प्रशंसा गरेको थियो ।
नेपाली प्रतिनिधि मण्डलका तर्फबाट प्रधानसेनापति गुरुङले एक चीन नीतिप्रतिको प्रतिबद्धता दोहर्याउदै नेपाली भूमि चीनका विरुद्व प्रयोग हुन नदिने बताएका थिए । अपराहृन ४ बजेबाट करिब एक घण्टा चलेको बैठकमा दुबै सैनिक बिच रही आएको सम्बन्धलाई अझ दरिलो पार्न उच्चस्तरीय भ्रमणलाई निरन्तरता दिने सहमति भएको छ । दुबैपक्षका हितमा हुने विषयमा एक अर्काका कठिनाई र चुनौतीलाई परस्पर सहयोग गर्दै अघि बढने प्रतिबद्धता समेत बैठकमा व्यक्त भएका थिए । साताव्यापी भ्रमणमा रहेको प्रधानसेनापतिको टोलीले मंगलबार चीन केन्द्रीय सैन्य आयोगका उपाध्यक्ष जु काइहाउसँग भेटने कार्यक्रम छ ।
कोई टिप्पणी नहीं:
एक टिप्पणी भेजें