बागलुङ, ३ कात्तिक। एकीकृत नेकपा माओवादीले आन्तरिक विवादलाई आसन्न केन्द्रीय कमिटीको बैठकबाट टुङ्गाउने निर्णय गरेको साता नबित्दै बागलुङमा आज एक प्रशिक्षण कार्यक्रमको आयोजना गरिएको छ।
जिल्लाका वैद्य पक्षधर नेताहरुले यसलाई पार्टीको आन्तरिक प्रशिक्षण भएको जनाएका छन्। तर संस्थापन पक्षका नेताहरुले भने यो एकपक्षीय भेला भएको भन्दै आफूहरुले बहिष्कार गर्ने घोषणा गरेका छन्। यसअघि माओवादीको स्थायी समिति बैठकले कात्तिक १७ गते केन्द्रीय कमिटीको बैठकभन्दा पहिला कुनै पक्षका पनि भेला नगर्ने निर्णय गरेको थियो।
बागलुङ बजारमा आयोजना गरिएको भेलालाई जिल्लास्तरीय भनेर प्रचार गरिए पनि वैद्य पक्षको मात्र भएको संस्थापन पक्षले बताएका छन्। भेलामा प्रशिक्षण दिनका लागि महासचिव रामबहादुर थापा स्थायी समिति सदस्य नेत्रविक्रम चन्द पोलिटब्युरो सदस्य हितमान शाक्य र केन्द्रीय सदस्य सन्तोष बुढामगर बागलुङ आउनुभएको छ।एकीकृत नेकपा माओवादीका जिल्ला इन्चार्ज तथा वैद्य पक्षका नेता पारसमणिले भेला कुनै एक पक्षको नभएर जिल्ला स्तरका अगुवा कार्यकर्ताहरुको भएको जिकिर गर्नुभयो। उहाँले बागलुङको कुन ठाउँमा भेला हुन्छ भन्ने बारेमा केही खुलाउनुभएन।
माओवादी बागलुङका संस्थापन पक्षका नेता तथा जिल्ला सह-इन्चार्ज धनप्रसाद सापकोटाले भने जिल्लामा हुने पार्टीको भेला एक पक्षीय र पार्टी लाइनविपरीतको भएको टिप्पणी गर्नुभएको छ।
उहाँले पार्टीको स्थायी समितिको बैठकविपरीत हुन लागेको भेला संस्थापन पक्षले बहिष्कार गर्ने बताउनुभयो।
कोई टिप्पणी नहीं:
एक टिप्पणी भेजें