कञ्चनपुर,२ कार्तिक। कञ्चनपुरको बेलौरीस्थित नेपाली भूमिमा आएर भारतीय पक्षले टहरा भत्काएपछि विभिन्न राजनीतिक दलले त्यस कार्यप्रति आपत्ति जनाएका छन्। कञ्चनपुरको भीमदत्त नगरपालिका वडा नं. ११ मा रहेको भुजेलामा एकीकृत नेकपा माओवादीका सभासद् कमल क्षेत्रीसहित गएको राजनीतिक दलहरुको टोलीले आपत्ति जनाएको हो।
सोमबार काचनपुरको भीमदत्तनगर पालिका-११ भुजेलामा बनाइएका नेपाली टहराहरु हतियारसहित आएका एसएसबीको टोलीले भत्काएको थियो। महाकाली किनारमा रहेको भुजेलाबस्तीमा रहेका भक्तबहादुर रानामगर, कल्याण पाल र उनकै भाइको टहरा भत्काएको पीडितहरुले बताएका छन्। सभासद् कमल क्षेत्रीले भारतको सो कार्य निन्दनीय भएको बताउँदै यसबारे आफुर पार्टी गम्भीर रहेको बताउनुभयो। सीमा सुरक्षा गर्ने अभियानमा प्रतिबद्ध भएर लाग्न जनतालाई आग्रह गर्दै उहाँले प्रधानमन्त्री डा बाबुराम भट्टराईको भारत भ्रमणका बेला यो घटना र अन्य सीमा समस्या समाधानका लागि पहल गरिनुपर्ने बताउनुभयो।यस्तै कञ्चनपुरमा रहेका प्रमुख राजनीतिक दल एकीकृत नेकपा माओवादी, नेपाली काँग्रेस, नेकपा एमाले र नेकपा मालेले विज्ञप्ति जारी गर्दै घटनाको विरोध गरेका छन्। विज्ञप्तिमा डकैती शैलीमा भारतीय प्रहरीले गरेको घटनाको निन्दा गर्दै पीडित परिवारलाई क्षतिपूर्ति र भारतीय पक्षले माफी माग्नुपर्ने उल्लेख छ।
विज्ञप्तिमा जिल्लाका विभिन्न स्थानमा भारतीय पक्षले अतिक्रमण गरेको नेपाली भूमि खाली गर्नुपर्ने मागसहित बह्मदेवमा विद्युतीकरणका लागि तार बिछुएको घटनाप्रति आपत्ति जनाइएको छ। हराएका सीमास्तम्भको खोजी गर्दै एकीकृत महाकाली सन्धिमा उल्लेख भएअनुसारका अधिकार नेपालले नपाएको र तत्काल भारतले नेपालतर्फ गर्नुपर्ने काम प्रतिबद्धता अनुसार तत्काल सम्पन्न गर्न माग गरिएको छ । दलहरुद्वारा जारी विज्ञप्तिमा महाकाली पुल २४ घन्टा खोल्नका लागि माग पनि गरिएको छ ।
सोमबार दिउँसो १ बजेतिर आएका भारतीय सीमा सुरक्षा बल एसएसबीले यो हाम्रो भूमि हो, तिमी नेपालीहरु भाग भन्दै टहराहरु भत्काएको पीडित नरेन्द्र रानामगरले बताउनुभयो। सीमास्तम्भ ८ ए नजिकै पर्ने र सारदा ब्यारेजको पूर्वपट्टि पर्ने भुजेलामा आएर भारतीय प्रहरीले टहरा भत्काइ दिएपछि स्थानीय बासिन्दाले सुरक्षाको माग गरेका छन्। दसगजामा आएर कुनै पनि काम गर्दा दुई देशको उच्चस्तरीय सहमति आवश्यक हुने गरेको भए पनि भारतले विभिन्न समयमा नेपाली भूमिमा हस्तक्षेप गर्दै आएको छ। एसएसबीले भत्काउँदैमा आफूहरु नेपाली भूमि नछाड्ने स्थानीयवासी देवदत्त पन्तले बताउनुभयो।एसएसबीले नेपालतर्फको थप ३० मिटर भू-भागमा पर्ने सबै क्षेत्रमा कब्जा जमाउने भन्दै धम्की दिएर गएको स्थानीयवासीले बताएका थिए। एसएसबीका जवानले सीमा क्षेत्रमा बस्ने नेपालीलाई घर नभत्काउन आग्रह गर्दा हातपातसमेत गरेका थिए। अनुगमन टोलीमा सभासद् क्षेत्रीसहित माओवादी इन्चार्ज डीडी पाण्डेय काँग्रेस सभापति बहादुरसिहं थापा एमाले अध्यक्ष ईश्वरीप्रसाद खरेल पूर्व सांसदलगायत विभिन्न राजनीतिक दलका प्रतिनिधि सामेल थिए।
यसैबीच नेपाल राष्ट्रिय फेडरेसनका महासचिव लिपक जोशीले विज्ञप्ति जारी गर्दै भारतीय पक्षबाट भएको हस्तक्षेपको विरोध गर्नुभएको छ। भारतीय सुरक्षा बलको रवैया असोज ३० का दिन भुजेलामा पर्ने नेपालीका घरपसल लुटेराको शैलीमा आई धम्काउने गाली बेइज्जती गर्ने लगायतका कामबाट प्रस्ट भएको विज्ञप्तिमा भनिएको छ ।
कोई टिप्पणी नहीं:
एक टिप्पणी भेजें