पूर्व ऊर्जामन्त्री विष्टको महत्वाकाङ्क्षी लक्ष्य पूरा नहुने

काठमाडौं, कार्तिक १४ - विद्युत् चुहावट नियन्त्रण गर्नका लागि पूर्व ऊर्जामन्त्री गोकर्ण विष्टले अगाडि सारेको महत्वकाङ्क्षी लक्ष्य पूरा नहुने भएको छ । 
ऊर्जा मन्त्रालयले छ महिनाभित्र विद्युत् चुहावट २० प्रतिशतमा सीमित गर्ने लक्ष्य राखेको थियो । तर व्यावहारिक तथा प्राविधिक कठिनाइका कारण यो लक्ष्य पूरा हुन नसक्ने अवस्था देखिएको हो । 
ऊर्जा मन्त्रालयका सहप्रवक्ता पुरुषोत्तम आचार्यले सरकार विद्युत् चुहावट नियन्त्रणका लागि इमान्दारीपूर्वक लागेको बताउँछन् । उनले केही प्राविधिक तथा व्यावहारिक जटिलताका कारण थोरै समस्या खडा भएको बताए ।
ऊर्जा मन्त्रालयले नेपाल विद्युत् प्राधिकरणलाई छ महिनाभित्र २८ दशमलब ७३ प्रतिशतमा रहेको चुहावटलाई २० प्रतिशतमा झार्न निर्देशन दिएको थियो । 
तत्कालीन ऊर्जामन्त्री गोकर्ण विष्टले यो विषयलाई महत्वका साथ अगाडि बढाएका थिए । वर्तमान ऊर्जामन्त्री पोष्टबहादुर बोगटीले प्राविधिक र व्यावहारिक जटिलतालाई हटाएर काम गर्न निर्देशन दिनुभएको सहप्रवक्ता आचार्यले बताउनुभयो । 
‘चोरी, हुकिङलगायतका समस्या हल गर्न सकिए पनि प्राविधिक चुहावट नियन्त्रण गर्नका लागि भने बृहत् अध्ययनको आवश्यकता रहन्छ त्यसकारण समस्या भएको हो,’ आचार्यले भने ।  
उनले मन्त्रालयले प्राधिकरणलाई तत्काल के कसरी चुहावट नियन्त्रण गर्न सकिन्छ, त्ससको कार्ययोजना पेश गर्न भनेको बताए ।