अज्ञात समूहद्धारा घरका स-परिवारलाई थुनेर आगजनी

रुकुम,७ कार्तिक। जिल्लाको झुला गाविसको एक घरमा बाहिरबाट ताला लगाएर आगजनी गरिएको छ। गाविसको वडा नं.१ का भीमबहादुर परियारको घरमा अज्ञात समूहले बिहान ४:०० बजे घरको मूलढोकामा ताला लगाएर आगजनी गरेको हो।

भीमबहादुरको आठ जनाको परिवार सुतिरहेको अवस्थामा मूलढोकामा ताल्चा मारेर अरु कसैले घरमा आगजनी गरिदिएको पीडित परियारले बताउनुभयो। उज्यालो भइसकेकाले छिमेकीले ढोका फोरेपछि मात्र आफ्नो परिवार बाहिर निस्कन सकेको उहाँले बताउनुभयो।

आगलागीमा परी रु ८० हजार नगदसहित करिब रु चार लाख बराबरको क्षति भएको पीडित परिवारले जानकारी दिएको छ। दस दिन अघिमात्र भारतबाट कमाएर ल्याएको रु ८० हजार नगद जलेको भीमबहादुरले जानकारी दिएका छन।आगलागीमा परी घरमा रहेका सबै लत्ताकपडा भाँडाकुँडा र अन्नपात जलेको इलाका प्रहरी कार्यालय बाँफीकोटले जनाएको छ। रासस