बहुला कुकुरले एक दर्जनभन्दा बढीलाई टोकेपछि सर्वसाधारण आतंकित

कार्तिक ७, उदयपुरको बसाहा गाविसमा रेबिज संक्रमित बहुला कुकुरले आइतबार बिहान एक दर्जनभन्दा बढीलाई टोकेपछि सर्वसाधारण आतंकित भएका छन् । कुकुरले सोही स्थानमा रहेको नारद आदर्श उच्च माध्यमिक विद्यालयका प्रधानाध्यापक प्रतापकुमार राई, बसाहा गाविस-९ का विजय राई, बखतबहादुर राई र नाम खुल्न नसकेका उनका छोरालाई टोकेको हो ।
यसै गरी बसाहा-९ कै दुर्गाप्रसाद राई र बेल्टार गाविस-८ का श्याम पौड्याल र बसाहा-८ का अन्यलाई पनि कुकुरले टोकेको स्थानीयले बताएका छन् । कुकुरले टोकेपछि घाइतेहरु उपचारका लागि जिल्ला अस्पताल गाइघाट र विराटनगरतर्फ गएको जनाइएको छ । मानिसहरुलाई टोक्दै हिँडेको बहुला कुकुरलाई स्थानीयहरुले नियन्त्रणमा लिने प्रयास गरिरहेको जनाइएको छ ।