भारतले दुईगुणा सस्तोमा इन्धन दिन्छु भन्यो भने पनि चीनसँग सम्झौता गर्नुपर्छ !

काठमाडौँ, चैत ४ । प्रधानमन्त्री केपी शर्मा ओलीलाई आसन्न चीन भ्रमणमा नेपाली भूमि लिपुलेक, कैलाश मानसरोवरको विषयमा समेत छलफल गर्न विज्ञहरुले सुझाव दिएका छन् । संयुक्त जनवादी युवा मोर्चाले आज आयोजना गरेको ‘प्रधानमन्त्रीको आसन्न चीन भ्रमण र उपलब्धि’ विषयक अन्तरक्रियामा उनीहरुले प्रधानमन्त्रीको चीन भ्रमणको पूर्वसन्ध्यामा भारतीय पक्षबाट चीनसँग हुने विभिन्न सम्झौता रोक्ने प्रयास भइरहेकामा त्यसतर्फ चनाखो हुन आग्रह गरेका हुन् ।
परराष्ट्रविद् हिरण्यलाल श्रेष्ठले प्रधानमन्त्री ओलीले चीन भ्रमणको क्रममा इन्धन सम्झौताका साथै लिपुलेकबारे कुरा उठाउनुपर्ने बताउँदै भारतले दुई गुणा बढी सस्तोमा इन्धन दिन्छु भने पनि चीनसँगको सम्झौता रोक्न नहुने बताए । राजनीतिक विश्लेषक प्रा.डा. सुरेन्द्र केसीले नेपालका राजनीतिज्ञको अपरिपक्वताका कारण चीन सरकारले तातोपानी नाका नखोलेको अवस्थामा नेपालको राष्ट्रिय सबलताका लागि राजनीतिक र कूटनीतिक क्षेत्रलाई जिम्मेवार बनाउनुपर्ने बताए ।

पूर्वराजदूत तथा परराष्ट्रविद् डा. विष्णुहरि नेपालले नेपाल र चीनबीचमा नयाँ मैत्री सन्धि हुनपर्नेमा जोड दिँदै अब नेपालले १० अर्ब अमेरिकी डलरको विकास योजना बनाएर चीनसँग सहयोग माग्नुपर्ने विचार व्यक्त गरे ।
वरिष्ठ पत्रकार प्रेम कैदीले नेपालले लिपुलेक मात्र नभई कैलाश मानसरोवरका बारेमा पनि अब कुरा उठाउनु पर्ने बताए । नेपाल बौद्धिक मञ्चका अध्यक्ष डा. केबी रोकाया, समाजशास्त्री डा. ललन चौधरी, नेपाल क्रान्तिकारी कम्युनिस्ट पर्टी अध्यक्ष केवी भट्टराईलगायतले चीनले ३७६ वर्ग किलोमिटरभन्दा बढी लिपुलेकको भूमि मिच्न खोजेको जानकारी दिँदै भ्रमणको पहिलो मुद्दा लिपुलेक बनाइनुपर्ने बताए । रासस