छठ पर्व मनाईदै/ पूजा स्थल भरि भराउ

जनकपुर, कार्तिक १५,-मिथिलाञ्चलको पवित्रतम् पर्व छठ विधि विधानसहित मनाईदैछ । यस पर्वको उत्कर्ष भनिने ‘सझुका अरक’ मंगलबार सन्ध्या अस्ताचलगामी सूर्यलाई अर्घ्य प्रदान गरी मनाईने छ । मूल पूजा सॉझदेखि सुरु हुने भए पनि गएराती अवेरदेखिनै श्रद्धालुहरु पवित्र घाटहरुमा जाने क्रम शुरु भई सकेको छ । विहान आठ वजेसम्म गंगासागर, धनुषसागर, अंगराजसर, दशरथ तलावलगायतका पोखरीहरु भरिभराउ भई सकेका छन् ।
चार दिवसीय छठ पूजाको चौथो दिन भोली विहान उदाउँदो सूर्यलाई अर्घ्य प्रदान गरी यो पर्व सम्पन्न हुनेछ । पर्वको पहिलो दिन आईतवार व्रती महिला पुरुष पवित्र जलाशयमा स्नान गरी अरवा अरवाईन(चोखो खाने कुरा) खाएका थिए । सोमवार दिन भरि उपवास बसी साझ गुलियो पुरी,खीर प्रसाद चढाई परिवारसहित खाएका थिए । जसलाई स्थानीय भाषामा षडना भनिन्छ । षडना पछि निराहार बसेका व्रतालुहरु गएरातीदेखि निराहार व्रत बसेका छन् । उदयाचलगामी सूर्यलाई अर्घ्य प्रदान गरी तथा छठको कथा श्रवण गरी मात्र उनिहरु अन्न जल ग्रहण गर्ने छन् ।