काठमाडौं, कार्तिक २ - मधेसी जनअधिकार फोरम लोकतान्त्रिकले विवादास्पद अभिव्यक्ति दिने रक्षामन्त्री शरतसिंह भण्डारीलाई सरकारबाट फिर्ता बोलाउने निर्णय गरेको छ ।
पार्टी कार्यालय सानेपामा बुधबार बसेको पार्टीको राजनीतिक समितिको बैठकले भण्डारीलाई सरकारबाट फिर्ता बोलाउने निर्णय गरेको हो । भण्डारी पक्षधरले नमानेकै कारण तीन दिनदेखिको बैठक निर्णयमा पुग्न सकेको थिएन ।
सत्तासाझेदार माओवादी र मधेसी मोर्चाका घटकलेसमेत राजीनामा दिनु नै उचित भनेपछि अध्यक्ष विजयकुमार गच्छदार पनि भण्डारीलाई राजीनामा गराउने निर्णयमा पुगेका थिए ।
पार्टी निर्णयको भण्डारीसहित उनी पक्षधरले नमान्ने घोषणा गरेका छन् । उनीहरुले अभिव्यक्ति दिएकै भरमा राजीनामा गराउन नहुने त्यसका लागि केन्द्रीय समिति बैठक बोलाउन माग गरेका छन् ।
रक्षामन्त्री भण्डारीले असोज ९ गते राजधानीमा आयोजित साक्षात्कारमा मधेसीहरु विभेदमा परिरहने हो भने मधेसका २२ जिल्लाले नेपालबाट अलग हुन सक्ने चेतावनी दिएका थिए । 'मधेसका २२ जिल्लाले छुटि्टने निर्णय गरे कुन ऐन र कानुनले मुलुकलाई बचाउँछ ?' उनले प्रश्न गरेका थिए ।
कोई टिप्पणी नहीं:
एक टिप्पणी भेजें