तीन दल सहमति नजिक/प्रधानमन्त्री भारतबाट फर्किएपछि घोषणा गरिने

काठमाडौ, कार्तिक ३ - शान्ति प्रक्रियाका विषयमा प्रमुख तीन दलबीच सहमति बनिसकेको र प्रधानमन्त्री बाबुराम भट्टराई भारत भ्रमणबाट फर्किएपछि त्यसको घोषणा गरिने भएको छ । भारत भ्रमण अगाडि सहमति गरेर सार्वजनिक गर्ने प्रधानमन्त्रीको चाहना भने पूरा हुन सकेन । समय अभाव र थप केही गृह कार्य गर्नुपर्ने भन्दै सहमति नजिक पुगेर पनि दलहरुले त्यसलाई सार्वजनिक गर्न चाहेनन्  ।
तीन दलका शीर्ष नेताहरुबीच बिहीबार बिहानै बालुवाटारमा बसेको बैठक शान्ति र संविधानका विषयमा सहमति नजिक पुगेका छन् । बुधबार साँझ गठन गरिएको तीन दलका नेता सम्मिलित तीन सदस्यीय कार्यदलले गरेको छलफल बारे शीर्ष नेतालाई बिहीबार बिहान बि्रफ गरेका थिए ।
बैठकपछि कार्यदलका नेताहरु माओवादीका वर्षमान पुन,कांग्रेसका कृष्ण सिटौला र एमालेका भीम रावलले सामूहिक रुपमा पत्रकारहरुसंग कुरा गर्दै भने- तीन दल सहमति नजिक पुगिसेको छ प्रधानमन्त्री भारतबाट फर्किएपछि सहमति सार्वजनिक गरिनेछ ।
तीन दलको बैठकपछि बालुवाटारमै बसेको सेना समायोजन विशेष समितिको बैठकले माओवादी लडाकुका ७ वटै शिविरमा तत्काल प्राविधिक समिति पठाउने निर्णय गरेको छ ।  अनमिनले प्रमाणिकरण गरेको १९ हजार ६ सय २ जना लडाकुको विवरण अद्यावधिक गर्न टोली खटाइने समिति सदस्य जीतेन्द्र देवले बताए ।
यसअघि समितिले २ सय १० जनाको सर्वेक्षण टोली गठन गर्ने निर्णय गरेको थियो । त्यस अनुसार विज्ञापन र अन्तर्वार्ता भइसकेर उनीहरुको नियुक्ति भएको थिएन । नियुक्ति प्रक्रिया सुरु गरी तत्काल शिविरमा टोली पठाइने समितिले निर्णय गरेको छ । टोलीले लडाकुको संख्या गन्नुका साथै अन्य कुरापनि अद्यावधिक गर्ने छ ।