रौतहट,२ कार्तिक। जनआन्दोलन २०६२/०६३ का घाइते पीडित सङ्घ रौतहटले विभिन्न सात सूत्रीय मागहरु राख्दै प्रमुख जिल्ला अधिकारीमार्फत् प्रधानमन्त्रीलाई ज्ञापनपत्र बुझाएको छ। पीडित सङ्घका अध्यक्ष प्रभातकुमार झाको नेतृत्वमा गएको जनआन्दोलनका घाइतेहरुले जिल्ला प्रशासन कार्यालयमा पुगेर प्रमुख जिल्ला अधिकारी हरिराज पन्तमार्फत प्रधानमन्त्रीलाई ज्ञापनपत्र पठाएका हु्न्।
उक्त ज्ञापनपत्रमा जनआन्दोलनका घाइतेहरुलाई राहत, घाइते परिवारका एकजनालाई सरकारी जागिर, घाइते परिवारका सदस्यहरुलाई निःशुल्क रुपमा शिक्षा, स्वास्थ्य, कृषि, यातायातका सवारीसाधनमा सुविधा, घाइतेहरुलाई आजीवन निवृत्तिभरणको व्यवस्था लगायतका सात सूत्रीय माग रहेको छ।यसैबीच आफ्नै दाजु-भाउजूलाई धारिलो हतियारले आक्रमण गर्ने जिल्ला विकास समिति रौतहटका पूर्वजिविस सभापतिलाई प्रहरीले मङ्गलबार नियन्त्रणमा लिएर अनुसन्धान थालेको छ।अंशबण्डाका लागि आफ्नै दाजु नरेन्द्रकुमार सिंह र भाउजू आशा देवीलाई सरुअठा गाविस-८ बस्ने जिविसका पूर्वजिविस सभापति तथा राष्ट्रिय प्रजातन्त्र पार्टी नेपालका जिल्ला अध्यक्ष सत्येन्द्रकुमार सिंहले सोमबार राति धारिलो हतियारले आक्रमण गरेको प्रहरीले जनाएको छ।
आक्रमणमा परी गम्भीर घाइते भएका दुवैलाई उपचारका लागि नारायणी उपक्षेत्रीय अस्पताल वीरगन्ज लगिए पनि त्यहाँ उपचार हुन नसकेपछि भारतको पटनातर्फ लगिएको जिल्ला प्रहरी कार्यालयले जनाएको छ । अंशका लागि दाजु-भाउजू उपर आक्रमण गरेको खबर पाएपछि जिल्ला प्रहरी कार्यालयबाट प्रहरी निरीक्षक मधु थापाको कमाण्डमा गएको प्रहरी टोलीले पूर्वसभापति सिंहलाई पक्राउ गरेको प्रहरी उपरीक्षक घनश्याम अर्यालले जानकारी दिनुभयो । रासस
कोई टिप्पणी नहीं:
एक टिप्पणी भेजें