सुरक्षाको नयाँ रणनीति बन्ने

काठमाडौं, कार्तिक १५ -   क्षेत्रीय सुरक्षा भेला गरी सुझाव संकलन गरिरहेको गृह मन्त्रालयले पूर्वाञ्चल र मध्यमाञ्चल भेलापछि शान्ति सुरक्षा कायम गर्न नयाँ रणनीति बनाउने भएको छ । पश्चिम, मध्यपश्चिम र सुदूरपश्चिम क्षेत्रमा सुरक्षा भेला भइसकेका छन् ।
मन्त्रालयका अनुसार कात्तिक १८ र १९ मा मध्यमाञ्चलको वीरगन्ज तथा २१ र २२ गते पूर्वाञ्चलको इटहरीमा भेला हुनेछ । 
'भेलामा समस्याहरू नयाँ ढंगबाट आएका छन, पाँचै क्षेत्रको भेला सकिएपछि मन्त्रालयले नयाँ नीतिगत निर्णयहरू गर्नेछ,' गृह प्रवक्ता सुधीर शाहले भने, 'भेला सकिएपछि नयाँ एक्सन प्लान बन्छ र त्यसैअनुसार नयाँ नीति नियम बनाई त्यहीअनुसार निर्देशनहरू जारी हुनेछन् ।'
उपप्रधान तथा गृहमन्त्री नियुक्त भएलगत्तै विजय गच्छदारले क्षेत्रीय सुरक्षा भेला थालेका हुन् । शाहका अनुसार पूर्वगृहमन्त्री कृष्णबहादुर महराले पनि अन्तक्रिर्या गरी बनाएको प्रतिवेदन पनि मन्त्रालयमा छ  । 'दुवै प्रतिवेदनको निष्कर्ष नयाँ रणनीतिमा समावेश हुनेछ,' उनले भने । महराले देशका पाँच क्षेत्रमा अन्तक्रिर्या गरी स्थितिबारे अवलोकन गर्ने क्रममै सरकार परिवर्तन भएकाले नयाँ नीति लागू गर्न सकेका थिएनन् ।