मधेशीमाथि मानवअधिकार हनन गर्दै दमन गरिएकोविरुद्ध जेनेभामा प्रदर्शन !

जेनेभा, कार्तिक १९। नेपालमा हालै जारी भएको संविधान विभेदकारी भएको भन्दै अधिकारको लागि आन्दोलन गरिरहेका मधेशीमाथि भएको दमनविरुद्ध संयुक्त राष्ट्रसंघको मानवअधिकार उच्च आयुक्तको कार्यालय जेनेभाअगाडि प्रदर्शन भएको छ ।
मधेशीहरुलाई गोली हानी हत्या गर्दै नेपाल सरकारले मानवअधिकार हनन गरेकोबारे अन्तर्राष्ट्रिय समुदायलाई जानकारी गराउन आन्दोलनरत संयुक्त लोकतान्त्रिक मधेशी मोर्चाका नेता देवेन्द्र यादव जेनेभा पुगेका हुन् ।
जेनेभामा मानवअधिकारको विश्वव्यापी आवधिक समिक्षा (युपीआर) जारी रहेका बेला नेता यादवले विभिन्न देशका प्रतिनिधिहरुसँग मधेसबारे ‘लबिङ’ गरेका छन् । समीक्षा बैठक चलिरहेको उच्च आयुक्तको कार्यालयअगाडि उनले नेपालको संविधान विभेदकारी रहेको भन्दै ‘नेपालको संविधान’ जलाउनुका साथै विरोध प्रदर्शन पनि गरेका छन् ।

युपीआरमा यादवबाहेक मानवअधिकारवादी एवं अधिवक्ता दीपेन्द्र झा पनि पुगेका छन् । उनले पनि मधेसमा मानवअधिकारको अवस्थाबारे अन्तर्राष्ट्रिय समुदायलाई जानकारी गराएका छन् ।
युपीआरमा राष्ट्रसंघका सबै सदस्य राष्ट्रको मानवअधिकारको विश्वव्यापी समीक्षा गरिन्छ । सरकारको नेतृत्व गर्दै परराष्ट्रमन्त्री कमल थापाको नेतृत्वमा टोली त्यहाँ पुगेको छ ।