काठमाडौ, कार्तिक १३ - सशस्त्र प्रहरी बलले कल्याणकोषको साढे २६ करोड लगानी गरेर राष्ट्रसंघीय मिसनअन्तर्गत हाइटी पठाएको गाडी र बन्दोबस्तीका सामानहरू फर्काइने भएको छ ।
एक सय ६० सुरक्षाकर्मीका लागि आवश्यक पर्ने सामग्री डेढ वर्षसम्म विभिन्न स्थानमा बेबारिसे झैं राखेर फर्काउन लागिएको हो । स्रोतका अनुसार अधिकांश खाद्य सामग्री कामै नलाग्ने भएका छन् भने अस्थायी घर बनाउने सामग्री न्यूनतम ३७ प्रतिशत काम नलाग्ने भएका छन् । त्यस्तै महँगा सवारीसाधन चालू हालतमा छैनन् ।
नेपाल सरकार र बलको मुख्यालयलाई ती सामानहरू फर्काइने पूर्वसूचना दिइएको थियो । सामानहरू सम्भवतः कात्तिक १५ बाट नेपालतर्फ पठाइनेछन्, जसमा पर्सनल करियर -एपीसी) तीन थान, टोयटाका गाडी १६ थान, विभिन्न बन्दोबस्ती र खाद्य सामग्री रहेको कन्टेनर २३ थान र अन्य ५० प्रकारका गाडी र सामान छन् ।
'राष्ट्रसंघकै लिखित आग्रहमा पठाएको सामग्रीका आधारमा बलका सुरक्षाकर्मीलाई तैनाथी गर्न अन्तिम समयसम्म अधिकतम प्रयास गरेका हौं तर लामो समय सामान बेवारिसे राखिँदा झन् धेरै क्षति पुग्छ भन्दै फर्काउने जानकारी पाउँदा दुःखित भएका छौं,' बलका महानिरीक्षक शैलेन्द्र श्रेष्ठले कान्तिपुरलाई भने ।
राष्ट्रसंघले शान्ति स्थापनार्थ आउन निमन्त्रणा दिएर सामान फर्काएको यो पहिलो हो । हाइटीमा भूकम्प आएलगत्तै सुरक्षा, उद्धार र सहयोगका लागि बोलाएको बलको टोली अकस्मात फैलिएको हैजा रोगका कारण रोकिएको थियो । शान्ति स्थापनार्थ खटिएका नेपाली सेनाको क्याम्पबाट हैजा रोग फैलिन सुरु भएको बताइएपछि दंगा फैलिएको थियो । नेपाली सुरक्षाकर्मीको थप तैनाथीले दंगा पुनः भड्किने सम्भावनालाई रोक्न बलको सुरक्षाकर्मीलाई रोकिएको थियो ।
हाइटीमा तत्काल बलका सुरक्षाकर्मीलाई खटाउन नसकिने भएपछि राष्ट्रसंघले २०६७ मंसिर १६ मा डार्फरमा खटिने गरी तयार हुन सूचित गरेको थियो । तर डार्फर सरकारले पनि सुरक्षाकर्मी खटाउने अनुमति लामो समयसम्म नदिँदा बलका सबै सामान फर्काउने निर्णयमा राष्ट्रसंघ पुगेको हो ।
२०६६ चैत ३० मा राष्ट्रसंघले हाइटीको ज्याकमेलमा ७५ दिन भित्रमा बन्दोबस्तीको सामानसहित खटिन नेपाल सरकारमार्फत बललाई आग्रह गरेको थियो । आग्रहअनुसार बलले सबै सामानपूर्व निर्धारित मितिमै खरिद गरेर पठाए पनि सुरक्षाकर्मी खटिने मिति तय नहुँदा सामग्री फर्काउनुपर्ने स्थिति आएको हो ।
बलले बन्दोबस्तीका सामान नेपालबाटै खरिद गरी पठाएको थियो भने भारतबाट आम्र्ड पर्सनल केरियर -एपीसी), चीनबाट पि्र-फ्याब र स्पेनको जिब्रलटारबाट टोयटा कम्पनीका गाडीहरू पठाएको थियो ।
सामानहरू हाइटी पुग्नुअगावै राष्ट्रसंघले औ प्रिन्सस्थित नेपाली सेनाको चार्ली क्याप र इटालीमा रहेको यू्एनको स्थायी क्याप बि्रन्डिसीमा राख्न निर्देशन दिएको
थियो । त्यसरी अस्थायी रूपमा राखिएको अधिकांश सामान खुला आकाशमुनि रहेकाले धेरै क्षति भइसकेको अनुमान बलका अधिकारीहरूको छ । राष्ट्रसंघले समयमै सामान झार्ने अनुमति नदिँदा बलले झन्डै ९० हजार डलर जरिवानाबापत क्षतिपूर्ति मात्रै तिर्नुपरेको थियो । समयमा सूचना नदिँदा बलका कैयौं सामान ७१ दिनसम्म विभिन्न पोर्टको गोदाममा थन्किएका थिए ।
नेपालबाट पठाएको सामान विभिन्न समस्याका बाबजुत सकुशल पुगेको स्वीकार्दै उसले बललाई ढुवानीबापतको रकम २ करोड ३४ लाख फिर्ता दिएको छ । तर बाँकी सामानको भुक्तानी भने प्रयोगमा नआइसकेकाले दिन राष्ट्रसंघ बाध्य छैन ।
हालै यूएन पुगेका एक अधिकारीले बलको मुख्यालयमा दिएको एक प्रतिवेदनअनुसार हाइटीस्थित चार्ली क्याम्पमा रहेका पि्र-फ्याब ३७ प्रतिशत भन्दा बढी कामै नलाग्ने भएका छन् । त्यस्तै टोयटाका विभिन्न महँगा १६ थान सवारीसाधनहरू इन्धन अभावमा नियमित रूपमा स्टार्ट गरिएका छैनन् । ती सवारीसाधनको क्षतिबारे तत्काल यकिन गर्न नसक्ने अवस्था रहेको उल्लेख छ ।
कोई टिप्पणी नहीं:
एक टिप्पणी भेजें