लन्डन, कार्तिक ३ - आफ्नो क्षेत्रमा नेपाली ओइरिएर ‘समस्या’ थपिएको गुनासो प्रधानमन्त्री डेभिड क्यामरुन समक्ष गरेर विवादमा तानिएका अल्डरसट तथा फार्नवोरो क्षेत्रका सांसद जेराल्ड होवार्थले फेरि केही साताअघि एउटा टेलिभिजन बहसमा अभिव्यक्ति दिए–‘गोरखाहरुलाई शरणार्थी जस्तै यूकेका विभिन्न भागमा छरेर राख्नुपर्छ ।’
आफूहरुलाई शरणार्थीसंग तुलना गरेपछि ‘स्वाभिमानी’ गोर्खाहरुको पारो नतात्ने त कुरै भएन, उनको यो अभिव्यक्तिले गोर्खा न्यायिक अभियानमा समर्पित बेलायती समेत आक्रोशित भए । गोरखाहरुलाई शरणार्थीसंग तुलना गरिएकोमा गोरखा अभियानकर्मी पिटर क्यारोलले प्रधानमन्त्री डेभिड क्यामरुन र उपप्रधानमन्त्री निक क्लेगलाई गोरखाहरुको योगदानको सम्मान गर्न आग्रह गर्दै गत २० सेप्टेम्बरमा पत्र लेखे ।
क्यारोलले पत्रमा ति मन्त्रीलाई तुरुन्त मन्त्रीपरिषदबाट हटाउन समेत माग गरेका थिए । भूपू गोर्खाहरुलाई आवासीय अधिकार दिलाउन प्रमुख भूमिका निर्वाह गर्ने अभिनेत्री एवं गोरखा अभियानकर्मी जोआना लुम्लेले पनि यसै विषयमा केन्द्रित रहेर पत्र लेखिन् । रसमोर मेयर एलेक्स क्राफोर्डले त गोरखाहरुको समर्थन गर्दै फेसबुकमा ‘वी लभ द गुर्खाज’ समूह नै खडा गरे जसको एकसातामै ६ सय सदस्य भएका थिए ।
बेलायती प्रधानमन्त्री डेभिड क्यामरुनले ४ अक्टोवरमा क्यारोललाई पत्रको जवाफ दिंदै गोरखाहरुमाथिको भेदभाव र पक्षपातपूर्ण व्यवहारप्रति आपत्ति प्रकट गरेका छन् ।
“गोरखाहरुबाट जे भएको छ त्यसको म सधैं सम्मान र प्रशंसा गर्छु । उनीहरुको वर्षौदेखिको बहादुरीपनले हामीले अंगाल्दै आएको जीवनपद्दति र हाम्रो परम्परालाई एउटा स्वतन्त्र र प्रजातान्त्रिक राष्ट्रका रुपमा सुरक्षित राख्न मद्दत गरेको छ । म उनीहरुलाई गौरवपूर्ण व्यवहार गरिएको देख्न कृतसंकल्पित छु”–उनले पत्रको चौंथो अनुच्छेदमा भनेका छन् ।
गोरखाहरुमाथिको भेदभाव र पक्षपातपूर्ण व्यवहार २१ औं शताब्दीको ब्रिटेनमा कदापी स्वीकार्य नहुने उल्लेख गर्दै प्रधानमन्त्री क्यामरुनले गोरखाहरुप्रति मिडिया वा अन्य समूहबाट भइरहेका भावोत्तेजक भाषाको भर्त्सना समेत गरेका छन् ।
“यो अति नै असहयोगपूर्ण र थप तनाव सृजना गर्ने कार्य मात्र हो”–विशेषगरी गोरखाका कारण आफूहरुले समस्या झेल्नुपरेको कारण देखाउँदै इन्टरनेटमा लुम्ले लिगेसी समूह खडा गर्ने युवा समूहप्रति लक्षित गर्दै क्यामरुनले भनेका छन् । सो समूहले गोर्खाहरु विरुद्ध १ अक्टोवरमा प्रदर्शन गर्ने तयारी गरिरहँदा ग्रेटर रसमोर नेपाली कम्युनिटी अध्यक्ष टिकेन्द्र दल देवानले विभिन्न बैठक डाकी स्थगन गर्न आग्रह गरेपछि अन्त्यमा प्रदर्शन टरेको थियो ।
सरकारले गोर्खा समस्यालाई गम्भीर रुपमा हेरिरहेको र अल्डरसटवासी गोरखाहरुलाई व्यवस्थित गर्न कोष खडा गर्ने तयारी भइरहेको पनि प्रधानमन्त्रीको पत्रमा उल्लेख छ । प्रधानमन्त्री क्यामरुनले कम्युनिटीज् सेक्रेटरी (मन्त्री) एरिक टिक्लेस्ले छिट्टै क्यारोललाई भेटेर गोर्खा समस्याको वस्तुस्थिति बुझ्ने आश्वासन पनि दिएका छन् ।
‘प्रधानमन्त्रीको सकारात्मक जवाफ नआएको भए सबै नेपाली संघसंस्था मिलेर प्रतिवाद गर्ने तयारी हुंदै थियो’– संयुक्त ब्रिटिश गोर्खा भूतपूर्व सैनिक संघ यूके संयोजक ज्ञानराज राईले भने–‘मन्त्रीको त्यो अभिव्यक्ति अत्यन्त आपत्तिजनक र मन दुख्ने खालको छ ।’ राईको संस्थाले क्यारोललाई एउटा पत्र लेख्दै समाज कल्याणमन्त्री र क्यारोलबीच हुने आगामी बैठकमा गोर्खाहरुको समान अधिकार विषय सशक्त रुपले उठाइदिन अनुरोध गरेका छन् ।
कोई टिप्पणी नहीं:
एक टिप्पणी भेजें