परीक्षणको रुपमा लगाइएको इन्सेफलाइटिस्को खोपबाट ६ जनाको अवस्था गम्भीर

कार्तिक ४,गत असोज ९ गते जापानिज इन्सेफलाइटिस् विरुद्धको खोप लिएकी काभ्रको पनौती नगरपालिका वडा नंबर १३ की ४७ बर्षिया देवकी भण्डारीको स्वास्थ्य अवस्था दिनप्रति दिन बिग्रदै गएको उनका परिवारका सदस्यले दाबी गरेका छन्। खोप लिनु अघि पूर्ण रुपमा स्वस्थ रहेकी भण्डारीलाई खोप लगाएको केही घण्टादेखि नै टाउको दुख्ने, ज्वरो आउने, वान्ता हुने भएको थियो।
 
त्यसपछि बनेपास्थित सिर मेमोरियल अस्पतालमा बनेपा लगिएकोमा त्यहाँ ४ दिन राखेपछि अस्पताले काठमाडौं पठाएको थियो। काठमाडौंको बानेश्वरस्थित भेनस अस्पतालमा भर्ना गरिएकी भण्डारीको स्वास्थ्यमा कुनै सुधार आउन नसकेको उनका श्रीमान कुमार भण्डारीले बताएका छन्। इन्सेफलाइटिस्को खोप लगाइएका अन्य ब्यक्तिहरुमा पनि समस्या देखिंदा पनि सम्बन्धित निकायले चासो नदिएको भन्दै सर्वसाधारणले आक्रोश ब्यक्त गरेका छन्। परीक्षणको रुपमा लगाइएको इन्सेफलाइटिस्को खोपबाट अहिले सम्म २२ जनालाई स्वास्थ्य समस्या देखिएको र ६ जनाको अवस्था गम्भीर रहेको चिकित्सकहरुले बताएका छन्।