लडाकूको संख्यामा कुरा मिल्दै गएको छ : अर्थमन्त्री

'कर छल्ने व्यापारीलाई कारवाही हुन्छ'
रुद्र खड्का, नेपालगन्ज, कात्तिक १४- अर्थमन्त्री वर्षमान पुनले मंसिर १४ भित्र शान्ति प्रक्रिया टुंगोमा पुर्‌याने गरी काम भइरहेको जानकारी दिएका छन्। उनले कर छली गर्ने व्यापारीलाई सरकारले कारवाही गरेर छाड्ने प्रतिबद्धता जनाए।  सोमवार विहान क्रान्तिकारी पत्रकार संघले नेपालगन्जमा आयोजना गरेको पत्रकार सम्मेलनमा पुनले समायोजन हुने माओवादी लडाकुको संख्यामा दलहरूबीच कुरा मिल्दै गएको बताए। 'हाम्रो चाहना ७ हजारलाई समायोजन गर्नुपर्छ भन्ने हो। अरु दलले ४- ७ हजार भनेका छन् उनले भने, 'अब एक/दुई बैठकमै यसबारेमा टुंगो लाग्छ।' साथै यही सरकारलाई राष्ट्रिय सरकार बनाउने प्रयास भइरहेको पनि उनले खुलाए।
विपा सम्झौताको बारेमा आफनै दलका कतिपय व्यक्तिले नबुझेर विरोध गरेको उनको भनाइ छ। 'विपाको बारेमा विस्तारै सर्वसाधारणले बुझदै गएकाले जनमत बढ्दै गएको पुनले दावी गरे। देशको आर्थिक विकासका लागि विदेशी लगानी नभित्र्याएसम्म केही नहुने भएकाले भारतसँग विपा सम्झौता गर्नु परेको उल्लेख गर्दै चाडै चीन र अन्य मुलुकसँग पनि त्यस्तै सम्झौता गर्न सरकारले तयारी गरिरहेको उनले जानकारी दिए।
माओवादीभित्र चर्कदो अन्तर्द्वन्द्ध बारे सोधिएको प्रश्नमा पार्टी फुटनबाट जोगिन तिव्र छलफल र विवाद भएको भन्दै उनले बचाउ गरे।