श्रीमानद्वारा आफ्नै श्रीमतीको हत्या

  कार्तिक १३ ,- श्रीमानको कुटाईबाट श्रीमतीको मृत्यु भएको छ। मृत्यु हुनेमा इलाम नगरपालिका-४ गोलाखर्ककी ३५ बर्षीया मुना शिवा रहेको जिल्ला प्रहरी कार्यालय इलामले जानकारी दिएको छ। शुक्रबार राती मादक पदार्थ सेवन गरी घर पुगेका श्रीमान चन्द्र शिवाले श्रीमती मुनालाई निर्घात कुटपिट गरेका थिए। कुटपिटवाट गम्भीर घाइते भएकी मुनाको राती नै उपचारका लागि विराटनगरस्थित न्यूरो अस्पताल पुर्‍याइएको थियो। उनको उपचारको क्रममा नै मृत्यु भएको प्रहरीले जानकारी दिएको छ। श्रीमान शिवालाई भने प्रहरीले पक्राउ गरी अनुसन्धान भइरहेको प्रहरी सहायक निरिक्षक लिलाबहादुर गुरुङले बताए।