बिपा काँग्रेसको पनि चाहना : निधि

अजित तिवारी, विराटनगर, कात्तिक ६ - काँग्रेस नेता बिमलेन्द्र निधिले भारत सरकारसँग भएको बिपा सम्झौताको स्वागत गरेका छन्। उनले काँग्रेसले चाहेकै सम्झौतामा हस्ताक्षर भएकोमा खुशी व्यक्त गरे। ‘बिपा सम्झौता राम्रो हो,' विराटनगर विमानस्थलमा आइतवार संवाददाताहरुसित निधिले भने,‘बिपाको वाहिर अनावश्यकरुपमा हित बिरोधी भन्दै बिरोध भइरहेको छ।'
बिदेशी लगानीकर्तालाई सुरक्षित तुल्याउन बिपा सम्झौता अन्तर्राष्ट्रिय प्रचलन अनुसार भएको निधिले बताए। ‘अहिले काँग्रेसको सरकार हुँदा पनि यो सम्झौता गर्थे,' उनले भने, ‘नेपालले लामो समयदेखि यो सम्झौता गराउन प्रयासरत थियो।'
काँग्रेस नेता निधिले भातृसंगठन विघटनको निर्णय पूर्नविचार नगरे पार्टी सभापति सुशिल कोइरालाका बिरुद्ध देशभरका कार्यकर्तामाझ जाने बताए। उनले भने, ‘भातृ संगठन बिघटनको निर्णय नसच्याउने सभापतिको भनाई हामीलाई स्वीकार्य छैन। पूर्नस्थापित गर्नैपर्छ र त्यही समितिले नै महाधिवेशन गराउँछ।' नेता निधिले केही दिनमै काठमाडौंमा केन्द्रीय सदस्य र सभासदहरुलाई डाकेर सभापति कोइरालाले भातृ संगठन बिघटन गरेको निर्णय बिरुद्ध छलफल गर्ने तयारी भइरहेको जानकारी दिए।
‘जिल्ला सभापतिहरुको भेला अगाडि केन्द्रीय सदस्य र सभासदसँग काठमाडौंमा भेट्दैछौ,' निधिले भने, ‘सभापति भेलामा आएका सुझाव अनुरुप हामी अगाडि बढ्छौ।' सभापति कोइरालाले पार्टीमा थालेको अल्पमत र बहुमतको खेलाले पार्टीको एकतालाई बल नपुर्‍याउने उनको भनाई छ। ‘भातृ संगठनको बिवाद हामी धेरै अगाडि बढाउन चाहन्नौं,' निधिले भने, ‘पार्टीमा एकता अहिले बढी जरुरी छ, त्यो कुरा सभापतिले बुझ्नुपर्छ।'