शीर्ष नेताको कम्बोडिया भ्रमण रद्द

काठमाडौं, कात्तिक ४ (नागरिक)- प्रमुख दलका शीर्षनेताले शनिबारबाट निर्धारित कम्बोडिया भ्रमण रद्द गरेका छन्। शान्ति प्रक्रिया तथा संविधान लेखन अलपत्र छाडेर नेताहरू कम्बोडिया जान लागेको भन्दै आलोचित भएपछि नेताहरूले भ्रमण रद्द गरेका हुन्। एकीकृत माओवादी, कांग्रेस र एमालेका पाँच-पाँच र मधेसवादी दल तथा अन्य साना दलका एक वा दुई शीर्ष नेता भ्रमणमा जाँदै थिए।
इन्टरनेसनल कन्फरेन्स अफ एसियन पोलिटिकल पार्टिज (आइक्याप) ले कात्तिक ६ देखि १० गतेसम्म कम्बोडियाको राजधानी नोमपेनमा नेपालको शान्ति प्रक्रियाबारे आयोजना गर्न लागेको सम्मेलनमा सहभागी हुन नेताहरू त्यसतर्फ जाने तयारी गरेका थिए।
'सबै दलका नेताले कम्बोडिया यात्रा रद्द गरेका छन्,' एमाले विदेश विभाग सचिव केशव पाण्डेले भने, 'प्रधानमन्त्रीदेखि सबै दलका शीर्ष नेता एउटै समयमा विदेश जाँदा जनतामा नराम्रो सन्देश जाने महसुस गरी रद्द गरिएको हो।'

एमाले नेता केपी ओलीले भने भ्रमण रद्द गर्न नहुने विचार राखेका थिए। प्रेस चौतारी चितवनले हिजो भरतपुरमा गरेको पत्रकार सम्मेलनमा बोल्दै ओलीले भनेका थिए,  'विदेशमा संविधान कसरी बनाउँछन् भन्ने अनुभवका लागि त्यो सम्मेलन फलदायी हुन्थ्यो। यहाँ बसेर थानका थान संविधान लेखेको लेख्यै गर्‍या भए पो जान नहुनु।