'रिसोर्ट' बैठक फेरि निष्कर्षविहीन

काठमाडौ, कार्तिक १४ - शान्ति प्रक्रियाका मूलभूत विषयमा सहमति जुटाउन सोमबार बिहान बसेको प्रमुख तीन दलका शीर्षनेताहरूको बैठक निष्कर्षविहीन सकिएको छ । यद्यपि नेताहरुले बैठक सकारात्मक भएको दाबी गरेका छन् ।

सोमबार बिहान करिव ४ घण्टा बुढानिलकण्ठस्थित पार्क भिलेज रिसोर्टमा बसेको बैठकमा यसअघि तीन दलीय कार्यदलले तयार पारेको प्रस्तावबारे छलफल भएको कांग्रेस नेता अर्जुन नरसिंह केसीले जानकारी दिए । कांग्रेस र एमालेले शान्ति प्रक्रिया र संविधान निर्माणका सवै विषयवस्तुलाई प्याकेजमै कार्यतालिकासहित तयार गर्नुपर्ने प्रस्ताव राखेका थिए ।

बैठक सहमतिमा पुग्न नसकेपछि मंगलबार पुनः प्रधानमन्त्री निवास बालुवाटारमा साँझ ४ बजे बस्ने केसीले जानकारी दिए । प्रधानमन्त्री निकट स्रोतका अनुसार मंगलबार बस्ने शीर्ष बैठकले सहमतिको आधार तयार गर्नेछ ।बैठकमा मुख्यतः माओवादी लडाकुको सङ्ख्या र प्याकेजबारे पनि छलफल भएको थियो छ ।

बैठकमा कांग्रेस, माओवादी र एमालेका शीर्षनेताहरूको सहभागिता रहेको थियो । बैठकमा कांग्रेस सभापति सुशील कोइराला, उपसभापति रामचन्द्र पौडेल, वरिष्ठ नेता शेरबहादुर देउवा तथा महामन्त्री कृष्ण सिटौला र नेता केसी, माओवादीका अध्यक्ष पुष्पकमल दाहाल, उपाध्यक्ष एवं प्रधानमन्त्री बाबुराम भट्टराई, वरिष्ठ उपाध्यक्ष मोहन वैद्य तथा सचिव सीपी गजुरेल सहभागी थिए ।  

एमालेका अध्यक्ष झलनाथ खनाल, पूर्वप्रधानमन्त्री माधव नेपाल, उपाध्यक्ष अशोक राई र प्रचार विभाग प्रमुख प्रदीप ज्ञवाली बैठकमा सहभागी भएका थिए ।