सुचना प्रविधिको प्रयोग गर्ने उद्योग प्रतिष्ठानहरु नाफामा

काठमाडौँ,६ कार्तिक। विश्वमा सुचना प्रविधिको प्रयोग बढ्दै जाँदा सुचना प्रविधिको प्रयोग गर्ने उद्योग प्रतिष्ठानहरु नाफामा गएको एक प्रतिवेदन सार्वजनिक भएको छ। संयुक्त राष्ट्रसंघीय संस्थाले गरेको एक अध्ययन प्रतिवेदनले गरिब तथा कम विकसीत मुलुकमा यसको प्रयोगले ५ प्रतिशत थप नाफा कमाएको तथ्य सार्वजनिक गरेको हो।

राष्ट्रसंघीय व्यापार तथा विकास सम्मेलन (अङटाङ) द्धारा सार्वजनिक विश्वव्यापी सुचना आर्थिक प्रतिवेदन अनुसार सुचना प्रविधिको प्रयोग नगर्दा कम्पनीहरुले ४ दशमलव २ प्रतिशत नाफा कमाउने गरेका थिए भने सुचना प्रविधिको प्रयोग गरिसकेपछि कम्पनीले ९ दशमलव ३ प्रतिशत नाफा कमाएको प्रतिवेदनमा देखाइएको छ। अङटाङले सुचना प्रविधिको प्रभावकारी ‌औजारको रुपमा ब्रोडब्यान्ड नेर्टवक सहितको कम्प्युटर, मोबाइल र ल्यान्ड लाइन फोनलाई लिएको छ। सुचना प्रविधिको प्रयोगले कुनै पनि काम छिटो छरितो रुपमा गर्न सकिने भएकोले कम्पनीहरुको उत्पादनको बिक्री ३ दशमलव ४ प्रतिशत बढेको छ।

यसका साथै सुचना प्रविधिको प्रभाव रोजगारीको क्षेत्रमा समेत परेको छ। रोजगार क्षेत्र अर्न्तगतमा सबैभन्दा बढी प्रभाव कामदारको उत्पादकत्वमा मेत परेको छ। सुचना प्रविधिको प्रयोगले रोजगारी १ दशमलव २ प्रतिशतले बढेको छ। सुचना प्रविधिको प्रयोग भएको प्रतिष्ठानहरुमा कामदार उत्पादकत्व ८ हजार ७ सय १२ डलर रहेको छ भने यसको प्रयोग नगर्ने कम्पनीहरुमा ५ हजार २ सय ८८ डलर उत्पादकत्व रहेको बताइएको छ।