हुलाकी सडकको निर्माण कार्य तत्काल सुरु गर्न माग

कैलाली,१४ कार्तिक। भारत सरकारको लगानीमा बन्न गइरहेको हुलाकी राजमार्गलाई चाँडोभन्दा चाँडो सुरु गर्न कैलाली मध्यवर्ती क्षेत्रका जनताले माग गरेका छन्। उनीहरुलॆ आइतबार कैलालीको भजनीमा भएको अन्तरक्रियामा यस्तो बताउनु कुरा बताएका हुन्।
उनीहरुले सो मार्ग निर्माणको ठेक्का लिएको भारतीय कम्पनी जी आर ग्राभर ज्वाइन्ट भेन्चर स्थानीयस्तरमा सडक निर्माणका लागि माटोको अभाव भएर फर्कने अवस्था आएपछि माग गरिएको बताइएको छ।

कार्यक्रममा भजनी गाविसका पूर्वअध्यक्ष इन्द्रकुमार मल्ल लालबोझी गाविसका पूर्वअध्यक्ष वीरबहादुर हमाल,एमालेका राष्ट्रिय प्रतिनिधि परिषद् सदस्य रतन रेग्मी,नेकपा एमाले पूर्व इलाका सचिव हेमन्तराज माण्डव्य, गाविस सचिव दीपककुमार मल्ल, हेमेन्द्र भारद्धाज, महेन्द्र रेग्मी, हर्क बुढालगायतले आ-आफ्नो धारणा राख्नुभएको थियो। उक्त क्षेत्रमा जग्गा मुआब्जा ५० प्रतिशतले मात्र लिएकामा अब तत्काल सबैले मुआब्जा लिने र सडक निर्माणका लागि माटोको उचित व्यवस्था गरिदिने प्रतिबद्धता समेत सहभागीहरुले व्यक्त गरेका थिए।

कार्यक्रममा  माटोको अभाव हुन नदिने बताउँदै स्थानीय राजनीतिक दलका प्रतिनिधि र अन्य सरोकारवालाले तत्कालै लालबाझी क्षेत्रबाट समेत सडक निर्माण कार्य सुरु गर्न माग गरेको बताइएको छ। माटोको अभाव भएपछि कैलालीको टीकापुर लम्कीक्षेत्रबाट निर्माण कम्पनीले सामग्रीहरु फिर्ता लगेर धनगढी पुर्‍ याएको थियो। यसअघि प्रमुख जिल्ला अधिकारी कैलाश कुमार बजिमयको अध्यक्षतामा कैलालीको फूलबारी र दुर्गौलीमा सर्वदलीय बैठक बसी सडक निर्माणमा सबैको सहयोग रहने प्रतिबद्धता व्यक्त गरेका थिए।
भारत सरकारको एक अर्ब ३० करोड र नेपाल सरकारको ७२ करोड रुपैयाँको लगानीमा सो मार्गको ६२ किलोमिटर सडकखण्ड निर्माण कार्य सुरु भएको हो। नेपाल सरकारले सो मार्गमा पर्ने आठवटा ठूला पुलमा ४० करोड जग्गा मुआब्जामा ३० करोड र विद्युत् खानेपानी पाइपलाइनहरु सार्नका लागि एक करोड ५० लाख रुपैयाँ विनियोजन गरेको छ। उक्त सडक खण्डमा स-साना गरी दुई सय ५० वटा बक्स कल्भर्ट आरसिसी प्रविधिद्धारा भारतीय निर्माण कम्पनीले गर्ने बताइएको छ। साइड कटिङ प्रविधिद्धारा नभई अन्य स्थानबाट माटो ल्याई फिलिङ गर्ने भएकाले बाटो निर्माणमा माटोको अभाव हुन गएको बुझिएको छ।
यता नेपाल सरकारले सडक निर्माणका लागि चाहिने माटो ग्राभेललगायत आवश्यक कच्चापदार्थ निर्माण कम्पनीलाई निःशुल्क उपलब्ध गराउने सहमति गरेको थियो। झन्डै आधा शताब्दीअघि तत्कालीन राजा महेन्द्रको समयमा नामकरण भई चलनचल्तीमा आएको उक्त हुलाकी सडकखण्ड कालोपत्रे हुने कार्य अब दुई वर्षभित्र पूरा हुने भएको छ। यस मार्गको निर्माण भएपछि मात्र कैलालीका अधिकांश गाविसको सीधै सम्पर्क सदरमुकामसँग हुने भएको छ। रासस