गालीगलौजमा माओवादी अनलाइनहरू

काठमाडौ, कार्तिक १४ -   'जनताको मुक्ति र विद्रोहका ठूलाठूला कुरा गर्ने क्रान्तिकारी नेता कामरेडले पार्टीको सम्पति व्यक्तिगत रूपमा ब्याजमा लगाएको सुन्दा तपाईंलाई कस्तो लाग्ला ? जनतालाई ब्याजबाट मुक्त गर्ने आन्दोलनमा होमिएको बताउने तिनै कामरेडले करोडौं रकम ऋणमा लगाई ब्याज उठाउने गरेका छन्' माओवादीनिकट नेपाल एभरेस्टन्युज डटकमले आइतबारको अनलाइन संस्करणमा 'क्रान्तिकारी कामरेडले लगाए पैसा ब्याजमा' शीर्षकमा एउटा समाचार प्रकाशन गरेको छ ।
एभरेस्टन्युजको समाचारमा माओवादीइतरको वामपन्थी पार्टीका कुनै नेतालाई होइन, आफ्नै पार्टीका पोलिटब्युरो सदस्य तथा नेवाः राज्य समिति इन्चार्ज हितमान शाक्यमाथि आरोप लगाइएको छ । त्यसमा भनिएको छ, 'ती कामरेड अरू कोही नभएर माओवादीका नेवाः राज्य समितिका इन्चार्ज हितमान शाक्य हुन् । धेरैतिर लगानी रहेका माओवादी उपाध्यक्ष मोहन वैद्यपक्षधर नेता शाक्यले कुपन्डोलमा रहेको प्रज्ञा अफसेटलाई २ करोड रुपैयाँ २४ प्रतिशत ब्याज लिने गरी दिएको एक स्रोतले नेपाल एभरेस्टन्युजलाई जानकारी दिएको छ ।'
समाचारमा जनाइएअनुसार विगतमा कृष्णसेन स्मृति प्रकाशन प्रालिका नाममा जनताबाट उठाइएको चार करोड रकम प्रकाशनलाई नदिई शाक्यले विभिन्न प्रेसमा लगानी गरेका हुन् । कृष्णसेन प्रकाशन आर्थिक अभावले बन्द रहेका बेला त्यसका नाममा उठाइएको पैसा अन्तै लगानी गरी शाक्यले ब्याज उठाउने गरेको अनलाइनको दाबी छ । साथै संविधानसभाताका पार्टीको खर्चमा सोही प्रेसमा गुणस्तरहीन पर्चा, पम्पप्लेट छापेर करोडौं कमिसन लिएको आरोप पनि उनीमाथि लगाइएको छ ।
शाक्यको नयाँ बसपार्कमा रहेको सिटिजन अफसेट प्रेसमा पनि लगानी रहेको अनलाइनले जनाएको छ । 'स्मरणीय यो छ कि विगतमा दरबार निकट रहेर मूर्ति तस्करीको आरोपमा पक्राउ परेका भरत गुरुङका छोरा उक्त प्रेसमा मुख्य हर्ताकर्ताका रूपमा रहेका छन्,' समाचारमा भनिएको छ । ब्याज उठाउन कहिले आफैं त कहिले पत्नी अमृता थापामगरलाई पठाउने गरेको पनि उल्लेख छ । स्रोतका अनुसार संस्थापन पक्षनिकट यस अनलाइनको अघोषित संरक्षक अर्थमन्त्री तथा स्थायी समिति सदस्य वर्षमान पुन हुन् ।
एभरेस्टन्युजले खासगरी अध्यक्ष पुष्पकमल दाहालका पक्षमा समाचार प्रकाशन गर्दै आएको छ । महासचिव रामबहादुर थापाले भारतीय गुप्तचर संस्था 'र' सँग अध्यक्षको साँठगाँठ रहेको आरोप लगाइरहेको बेला उनै थापाले २०५७ मा 'प्रचण्ड जनक्रान्तिको सर्वोच्च कमाण्डर हो' शीर्षकमा लेखेको लेख महत्त्वकासाथ राखिएको छ । अध्यक्षको चर्को विरोध गर्ने उपाध्यक्ष वैद्यको 'विचारको आविश्कारक प्रचण्ड हुनुहुन्छ,' शीर्षकको पुरानो लेख राखिएको छ । 
यता माओवादीको वैद्य समूहका ऋषिराज बराल, अनिल शर्मालगायतले सञ्चालन गरेको 'द नेक्स्ट फ्रन्ट' अर्थात् 'अर्को मोर्चा' नामक अनलाइनले भने अध्यक्ष दाहाल र प्रधानमन्त्री तथा उपाध्यक्ष बाबुराम भट्टराईमाथि गम्भीर प्रकृतिका आरोप लगाई समाचार प्रकाशन गर्दै आएको छ । 
'मुलुकमारा दलाल बाबुरामलाई कालो झन्डा देखाऊ' शीर्षकमा उक्त अनलाइनमा हालै प्रकाशित एक समाचारमा भनिएको छ, 'बाबुराम भट्टराई भारतीय विस्तारवादको असली दलाल हो, यो मुलुकमारा हो भनेर भनिँदै आएको कुरा हालै भारतीय लगानीलाई सुरक्षति गर्ने गरी उनीद्वारा गरिएको देशको अर्थतन्त्र चौपट पार्ने खालको 'बिप्पा' सम्झौताले प्रस्ट पारेको छ । मुलुकलाई टाट पल्टाउने, एक एकवटा बहाना गरेर सबै पैसा भारत पठाउने सम्झौता गरेर बाबुरामले आफू भारतीय अच्छा दलाल भएको पुष्टि गरेका छन् ।'
त्यस्तै 'प्रचण्ड नै पाएपछि बाबुराम किन चाहियो ?' शीर्षकमा प्रकाशित अर्को समाचारमा अध्यक्ष दाहालविरुद्ध तथानाम लेखिएको छ । दाहाल अघोषित र भट्टराई घोषित भारतीय दलाल भएको आरोपसहितको समाचारमा लेखिएको छ, 'वास्तवमा घोषति दलालभन्दा अघोषति दलाल नै फाइदा र काइदाको हुन्छ । सिलगुडीमा 'र' का प्रमुख र प्रचण्डको भेटघाटपछि बाबुराम होइन, प्रचण्डलाई भारतीय विस्तारवादले आफ्नो शुभचिन्तक दलालको पहिलो र बाबुरामलाई दोस्रो सूचीमा राखेको छ भनेर गरिने चर्चा सही प्रमाणित भएको छ ।'
एक अर्को समाचारमा उपाध्यक्ष वैद्य र महासचिव रामबहादुर थापाले नेतृत्व गरेको क्रान्तिकारी धारमा कति कार्यकर्ता छन् र यसको शक्ति कति छ भन्ने कुरा विस्तारवादका दलालहरूले चाँडै थाहा पाउने छन् भनी दाहाल र भट्टराईलाई चेतावनी दिइएको छ ।