उजिर मगर, काठमाडौं, कात्तिक १४- पाल कम्युनिस्ट पार्टीका संस्थापक पुष्पलाल स्मृति प्रतिष्ठानले आइतबार दुई दर्जन पुराना कम्युनिस्ट नेताहरूको जमघट जुराएको छ। प्रतिष्ठानका अध्यक्ष माधवकुमार नेपालको चाँजोमा अर्धभूमिगत मसालका नेता मोहनविक्रम सिंहदेखि माओवादी उपाध्यक्ष मोहन वैद्यसम्म एक ठाउँ भेला भएका छन्।
कम्युनिस्ट पार्टीका संस्थापक जीवित सदस्य नरबहादुर कर्माचार्य र कम्युनिस्ट नेतामध्ये सबैभन्दा जेठा ८९ वर्षका गौरीभक्त प्रधानसमेत कार्यक्रममा सहभागी भए। पुराना कम्युनिस्ट नेता कमलराज रेग्मी, डिपी अधिकारीसम्म कार्यक्रममा जुटेका थिए।
मोहनविक्रमले निम्तो स्वीकारेकाले नेपालले सञ्चार माध्यमलाई बोलाएनन्। पछि मोहनविक्रमले फोटो सार्वजनिक गर्न अनुमति दिएपछि नेपालले थकथकी माने। 'चित्रबहादुर केसीले मोहनविक्रमको फोटो सार्वजनिक गर्दा हुने नीति छ भन्नुभयो,' प्रतिष्ठानका सदस्य वेदुराम भुसालले नागरिकसँग भने।
जमघटमा पाका नेताहरूले उतिबेला कम्युनिस्ट पार्टी गठनको सन्दर्भको सम्झना गरेका थिए। '०९८ सालमा प्रजातन्त्र संघ खोलियो। नागरिक स्वातन्त्रताका लागि विभिन्न कार्यक्रम गर्यौं। २००६ वैशाख १० गते कम्युनिस्ट पार्टी गठन गरेका हौं। पुष्पलालजीले दस्तावेज लेखेर दिनुभयो। हामीले पारित गर्यौं,' संस्थापक सदस्य कर्मचार्यले भेटमा भने।
कार्यक्रममा माओवादी अध्यक्ष पुष्पकमल दाहाललाई पनि निम्ता थियो। नेपालले जमघटमा भने, 'प्रचण्डजीलाई पनि बोलाएको हो। फोन गरेको उठेन। उहाँले रिप्लाई गर्नु भएन, त्यही भएर छुट्नुभयो।'
प्रतिष्ठानको कार्यक्रमले वैद्य र मोहनविक्रमको चार वर्षपछि फेरि भेट जुरायो। उनीहरूले केही भलाकुसारी गरेर हाँसो साटासाट गरे। 'चार वर्षअघि एउटा एफएमले आयोजना गरेको कार्यक्रममा वैद्यजीसँग भेट भएको थियो, त्यसपछि आजै हो,' मोहनविक्रमले नागरिकसँग भने।
कृष्णराज वर्माले कम्युनिस्टकै सरकार भएका बेला पुराना नेताहरूलाई के गर्यौ भनी नेपाललाई प्रश्न गरेका थिए। 'चार-पाँचजना कम्युनिस्ट प्रधानमन्त्री बनिसक्यौ। खै त पुराना नेताहरूलाई के गर्यौ। बल्ल आज भेट गराउने,' वर्माले नेपाललाई दुखेसो पोखे।
मोहनविक्रमले पुराना नेताहरूको यो जम्काभेट ऐतिहासिक भएको बताए। 'यो भेट ऐतिहासिक हो। नेपाली कम्युनिस्ट अन्दोलनमा भएका सबै अनुभवलाई एक ठाउँमा राख्ने साझा संस्था बनाऊँ। जहाँ एकै ठाउँबाट नेपाली कम्युनिस्ट आन्दोलनबारे अध्ययन गर्न सकियोस्,' मोहनविक्रमले भने।
सरकार कम्युनिस्टकै नेतृत्वमा रहेको अहिलेको बेलामा यस्तो तर्क गर्दै मोहनविक्रमले भने, 'जसले जसका बारेमा लेखेका भएपनि सबै दस्ताबेजलाई एउटा कम्युनिस्ट इन्सइक्लोपेडिया बनाऊँ।'
सबै नेताले आफ्ना संस्मरण लेख्दै गए भावी पुस्तालाई अध्ययन गर्न सजिलो हुने उनको तर्क छ।
जमघटमा मोहनचन्द्र अधिकारी, एमाले अध्यक्ष झलनाथ खनाल, अमिक शेरचन, श्यामप्रसाद शर्मा, सिद्धिलाल सिंह, मोदनाथ प्रश्रित, चन्द्रदेव जोशी लगायत नेता थिए। श्रेष्ठ पत्नी साहना प्रधान बिरामी भएकाले अनुपस्थित भइन्।
केशरजंग रायमाझीलाई निम्ता थियो। उनी घरमा काम परेकाले नआएको नेपालले जानकारी गराए। त्यस्तै नेताहरू माधव ज्ञवाली, केदार उपाध्यायले राजधानी बाहिर रहेकाले उपस्थित हुन नसक्ने जानकारी गराएका थिए।
मोहन वैद्यसँग मोहनविक्रम सिंह। तस्बिरः चन्द्रशेखर कार्की
कोई टिप्पणी नहीं:
एक टिप्पणी भेजें