लन्डनमा नेवाः विश्व सम्मेलन

काठमाडौँ, १३ कार्तिक। नेपाल भाषा एकेडेमीका कुलपति सत्यमोहन जोशीले मातृभाषाको रक्षा गर्नु नै सबै नेपालीको दायित्व र जिम्मेवारी भएको बताउनु भएको छ। बेलायतको लन्डनमा शनिबारदेखि सुरु भएको तीनदिने विश्व नेवाः सम्मेलनको उद्घाटन गर्दै उहाँले ‘भाषा म्वासाः जाति म्वाई जाति म्वासाः भाषा म्वाई’ भाषा बाँचॆ जाति रहन्छ जाति रहे मात्र भाषा रहन्छ भन्नुभयो।
कुलपति जोशीले भन्नुभयो – हामीले आफ्नो भाषालाई बचाउन सकेनौं भने हाम्रा सन्ततिले हामीलाई धिकार्नेछ। मातृभाषाको संरक्षणका लागि आ-आफ्नो ठाउँबाट पहल गर्नुपर्छ । मातृ भाषा बचाउन सक्यौं भने मात्र सन्ततिले लगाउन सक्ने आरोपबाट हामी मुक्त हुन सक्छौँ। नेवाः स्वायत राज्य प्राप्तिका लागि नेवारहरुमा राजनीतिक चेतना जागृत हुनुपर्ने उहाँको कथन थियो। ‘मातृभाषामा एउटा शक्तिनिहीत हुन्छ मातृभाषाको शक्तिले जस्तो विचार पहिल्याउँछ अर्को कुनै भाषाबाट त्यस्तो विचार पहिल्याउन सक्दैन’ उहाँले भन्नुभयो।
नेवार जाति नेपाल भाषा नेवारी परम्पराको संरक्षण र संवद्र्धन तथा नेपालका अन्य जातिको भाषा धर्म संस्कृतिसम्बन्धमा समान अधिकार स्थापित गर्न आवाज उठाउन सम्मेलनको आयोजना गरिएको हो। वल्र्ड नेवाः अर्गनाइजेसन र पासा पुचः गुथि युकेको संयुक्त आयोजनामा भएको उक्त सम्मेलनको नारा ‘लन्डन वनेनु झिगु सः हलिमय् थ्वयेकेन’ लन्डन जाऔँ विश्वमा हाम्रो आवाज बुलन्द गरौँ रहेको छ।
सम्मेलनमा नेपाल जापान अमेरिका बेल्जियम जर्मन स्पेनलगायतका १२ मुलुकका नेवार जातिको सहभागिता रहेको विश्व नेवाः सङ्घका उपाध्यक्ष सुवर्ण बज्राचार्यले बताउनुभयो। नेपालबाट सहभागी गणेशराम लाछीले पुचः गुथिका अध्यक्ष सचेतन तुलाधर, संयुक्त श्रेष्ठ, सुरेश श्रेष्ठ, सुरेश वैद्य, राजेन्द्रप्रसार श्रेष्ठ, वीरेन्द्र श्रेष्ठ, डा बालगोपाल श्रेष्ठ, अमृता श्रेष्ठ, विजय बज्राचार्य, दयारत्न शाक्यलगायतलाई सम्मान गर्नुभएको थियो ।
सम्मेलनमा नेपालबाट प्रा माणिकलाल श्रेष्ठ पूर्व मन्त्री पद्मरत्न तुलाधर प्रा प्रेमशान्ति तुलाधर सहभागि भइरहनु भएको लन्डनबाट प्राप्त समाचारमा जनाइएको छ। नेपाल भाषा एकेडेमीका कुलपति जोशीले एकेडेमीबाट प्रकाशित नेपालभाषाको शब्दकोष वल्र्ड नेवाः अर्गनाइजेसन तदर्थ समितिका संयोजक दयारत्न शाक्यलाई हस्तान्तरण गर्नुभएको थियो । रासस