कांग्रेसद्वारा धरान बन्द

धरान, कार्तिक ४ - नेपाली कांग्रेसको भातृ संगठन तरुण दलका तीन कार्यकर्तालाई प्रहरीले विनाकारण पक्राउ गरेर मरणासन्न हुने गरी कुटपिट गरेको भन्दै शुक्रबार तरुण दलले धरान बन्द गरेको छ ।
बन्दले धरानको शैक्षिक प्रतिष्ठान, यातायात व्याबसाय, व्यापारिक प्रतिष्ठान प्रभावित भएको छ । कांग्रेस क्षेत्रीय सचिव सुजेन्द्र तामाङले तरुण दलका धरान-१७ रिटिङ बस्ने राजकुमार भुजेल, लभकुमार राई र योगेन राईलाई प्रहरीले विना कारण पक्राउ गरेको बताए । पक्राउ परेको तीनैजनालाई विनाशर्त रिहा गर्नु पर्ने माग गदर्ैै एक दिन धरान बन्द गरिएको तामाङले बताए । उनीहरुलाई प्रहरीले विहिबार रेल्वेलाइनबाट स्थानीय बासिन्दाको सहयोगमा पक्राउ गरेको प्रहरीले जनाएको छ ।
इलाका प्रहरी कार्यालय धरानका डिएसपी राजेन्द्र विष्टले भने उनीहरु ज्यान मार्ने उद्योगमा सम्लग्न अपराधी भएकाले पक्राउ गरिएको बताए । डिएसपी विष्टका अनुसार पक्राउ परेका भुजेल, लभकुमार र योगेनले गत भदौ ५ गते धरान- १७ रेल्वेमा सुरेन्द बस्याल माथि धारिलो हतियारले आक्रमण गरेर फरार रहेका थिए । विष्टले अपराधी पक्राउ गर्दा राजनितिक दवाव आएको बताए । उनले राजनितिक दवाव आए पनि अपराधीलाई नछाड्ने दावी गरेका छन् ।
प्रहरीले शुक्रबार नै तिनैजनाको म्याद थप गर्ने तयारी गरेको छ । तर कांग्रेसका जिल्ला र क्षेत्रीय नेताहरुले उनीहरु निर्दोष रहेको र प्रहरीले फसाएको भन्दै तत्तकाल नछाडे थप आन्दोलन गर्ने जनाएका छन् ।