सेना समायोजनको मुद्दा छिटै सुल्टने प्रमको दावी

जनकपुरधाम, कात्तिक १३ - प्रधानमन्त्री तथा एकीकृत नेकपा (माओवादी) का उपाध्यक्ष बाबुराम भट्टराईले गणतन्त्रका उपलब्धिलाई संस्थागत गर्नु सबैको दायित्व भएको बताएका छन्।एकीकृत नेकपा (माओवादी) मिथिला मध्यराज्य समितिले आयोजना गरेको कार्यक्रममा उनले जनयुद्ध, जनआन्दोलन र मधेस आन्दोलनबाट प्राप्त उपलब्धिलाई सम्मानजनक ढङ्गले संस्थागत गर्नुपर्ने बताए। प्रधानमन्त्री भट्टराईले विगतमा मधेसी समुदायमाथि भएको उपेक्षाभाव भ्रर्त्सनायोग्य छ भन्दै मधेसीलाई राज्यका हरेक निकायमा समानुपातिक सहभागिता गराउने सन्दर्भमा ल्याउन लागिएको समावेशी विधेयक अझ उपयोगी हुने विश्वास व्यक्त गरे।
उनले संविधान निर्माण र शान्ति प्रक्रिया टुङ्गोमा पुग्ने गरी प्रमुख राजनीतिक दलहरुबीच छिट्टै सहमति हुन लागेकाले आगामी मङ्सिर १४ सम्ममा संविधानको प्रारम्भिक मस्यौदा आउने विश्वास व्यक्त गरे।
प्रधानमन्त्री भट्टराईले माओवादी लडाकुका हतियार रहेका कन्टेनरको साँचो हस्तान्तरणपछि नेपाली जनतामा उत्साहको सञ्चार देखिएकाले सेना समायोजनको मुद्दाको छिट्टै निकास निस्कने पनि बताए।
विगतमा मधेसीलाई सेनामा भेदभावपूर्ण व्यवहार भएको सन्दर्भमा मधेसी मोर्चासँग भएको चारबुँदे सहमतिबाट उक्त अवस्थाको अन्त्य हुने धारणा पनि उनले राखे।