संविधानसभा भवन बाहिर काग सम्मेलन

काठमाडौं, कार्तिक ६ - काग तिहारका उपलक्ष्यमा गौतम सापकोटा (चरी दादा)ले काग सम्मेलन गर्ने भएका छन् ।
देउराली क्लबले आइतबार राजधानीमा पत्रकार सम्मेलन गरी शान्ति र संविधान निर्माणको कामनासहित आगामी कात्तिक ८ गते संविधानसभा भवन बाहिर काग सम्मेलन गर्न लागेको जानकारी गराएको हो ।
कार्यक्रममा सापकोटाले यस वर्षको सम्मेलन विशेष महत्त्वको हुने बताए । देशमा शान्ति र संविधान अनिश्चित बन्दै जाँदा काग सम्मेलन गरी दबाब सृजना गर्न लागेको उनको भनाइ थियो ।
विगत चार वर्षयता काग सम्मेलन गर्दै आएका सापकोटाको नाम विश्वको एक सय ५१ चरीको आवाज निकाल्ने व्यक्तिका रुपमा 'गिनिज बुक अफ द वर्ल्ड रेकर्ड'मा नाम दर्ता भइसकेको छ ।