कोइरालाले सोधे- 'म कसरी तानाशाह ?'

तनहुँ, कार्तिक ६ - कांग्रेस सभापति सुशील कोइरालाले कांग्रेसभित्र आफू सामान्तवादी नभएको विचार व्यक्त गरेका छन् ।
कांग्रेस तनहुँले आइतबार दमौलीमा गरेको कार्यकर्ता भेलामा सभापति कोइरालाले सामान्तवादीहरुको विश्वबाट नै हार भई सकेकाले आफूले प्रजातान्त्रिक लोकतन्त्र भन्दा बाहिर केही नसोचेको बताए । उनले पार्टीबीचको विवाद निकालेर आन्तरिक असमझदारी वढाउनुको साटो एक भएर कांग्रेसले मुलुकमा नयाँ निर्णय दिने बेला आएको बताए । 'मैले पार्टी भित्र तानाशाही विचार लादेको छैन,' कोइरालाले भने, 'मैले प्रजातन्त्रको आस्था बोकेको कांग्रेसको एउटा नेताको हैसियतले कसरी म तानाशाह बन्न सक्छु ।'
उनले आफू गुटबन्धीका कारण कांग्रेस पछि पर्ने भन्दै आफू कुनै गुटबन्धीमा सकृय नभएको बताए । 'कांग्रेस भित्र गुटबन्दीको राजनीति गर्नेहरुलाई सबैले वहिष्कार गरौं,' कोइरालाले भने, 'अब फुटेर होइन जुटेर अघि बढ्ने बेला आएको छ ।' उनले आफू प्रजातन्त्रकै पक्षमा जीवन सर्मपित गरेकाले राष्ट्रियता, प्रजातन्त्र र समाजवादको विचारबाट अलग नरहेको बताए ।  
कोइरालाले बहुसंख्यक कार्यकर्ताहरुको मनोभावना अनुसार नै आफूले भ्रातृ संगठनहरु विघटन गरेको बताए । भातृ संगठनहरुको म्याद सकिई सकेकोले विघटन गरिएको हो,' उनले भने, 'यही कारणले कांग्रेस फुट्दैन ।' उनले कांग्रेस फुटाएर प्रजातन्त्र कमजोर पार्न खोज्ने शक्तिहरु सकृय भए पनि कांग्रेस फुटाउने तागत कसैसँग नभएको वताए ।